Molly Bloom's Day™

Anika Meqanikuri-ს ფოტო

რა უნდა მიაყოლო ჩაის?

გემრიელი კექსი, ტკბილზე ტკბილი ბაქლავა, შეფიცხებული, ყველით გაძეძგილი ხაჭაპურის ნაჭერი… თონის პურიც არ არის ურიგო, სქლად გადასმული სოფლის კარაქით და ზემოდან შემოსკუპებული სულუგუნით…

წიგნის მიყოლება თუ გიცდიათ?

აი, რომ ზიხარ შენთვის, არსად გეჩქარება, ნეტარი უსაქმურობით ტკბები, ჟოლოსმურაბიან ჩაის სვამ ნება-ნება და გემრიელ წიგნს აყოლებ. დამიჯერეთ, არაფრით არის ტორტის ნაჭერზე ნაკლები )

ჰოდა, ერთ ასეთ წიგნზე უნდა მოგიყვეთ, პირის ჩასატკბარუნებელსა და ყელის ჩასაკოკლოზინებელზე.

თავიდანვე გეტყვით: სადებიუტო კრებულია და ერთიორად საინტერესოც – საუკუნეა, ახალი მწერალი არ შემხვედრია და ასე არ მომწონებია.

რუსუდან რუხაძე ბოლო “წეროზე” გავიცანი. მე ჩემი ფავორიტი მყავდა, რუსოს გადასარევი “Make My Demons Run“, მაგრამ  კონკურსანტები მაინც გულდასმით გადავათვალიერე და ჩამონათვალში “ადა და ევას” მოვკარი თვალი.

სათაური იყო ისეთი, გულგრილად ვერ ჩაუვლიდი, დამაინტრიგებლად პიკანტური. ძალით წაგაკითხებდა თავს. წავიკითხე და… ძალიან მომეწონა.

სხვებსაც მოსწონებიათ, როგორც ჩანს – მესამე პრიზი ხვდა წილად.

მერე “სულაკაურის” “თხუთმეტ საუკეთესოში” გამოჩნდნენ გოგოები. ბედი გაეხსნათო, კი იხუმრა რუსიკომ, მაგრამ იმ ხუმრობას რა ვუთხარი, სიმართლის გვარიანი ყლუპი თუ არ ურევია… ჰოდა, არც მთლად ხუმრობა გამოდგა.

ცოტა ხანში კუწკუწა კრებული მოაყოლა “ინტელექტმა” – უყვართ მაგათ ახალი ავტორების აღმოჩენა.

ჯერ მარტო ეპიგრაფი აქვს ამ “ჩაისთან მოსაყოლ ამბებს” ერთი წიგნის ფასი – “ვუძღვნი გამქრალ გოგოებს. საქართველოში სქესთა დარღვეული თანაფარდობის შესაძლო მიზეზი სელექციური აბორტია”. ჰოდა, დამეთანხმეთ, ასეთი დასაწყისის მერე ძნელი წარმოსადგენია, ვინმემ გულგრილად გადადოს გვერდზე.

“ადა და ევას”  გარდა ცხრა მოთხრობაა ამ კრებულში, ყველა – განსხვავებული ტონით, სტილით, განწყობით დაწერილი. თითოეულზე კარგა ხანს ილაპარაკებდა პატიოსანი ბლოგერი, მაგრამ მირჩევნია, თავად წაიკითხოთ და მერე გამომიაროთ შთაბეჭდილებებით დამძიმებულებმა. ისეთი ცოცხალი ტექსტებია, იმდენად თანამედროვე,  რომ, დარწმუნებული ვარ – სათქვენოს ყველა იპოვით და სათქმელი ყველას გამოგიჩნდებათ.

ჰო, ერთიც: ეს ჩვენი კრებული “საბას” შორტლისტშია, “საუკეთესო დებიუტის” ნომინაციაში. “საბას” ნომინანტობა გამობრძმედილი მწერლებისთვისაც კი დიდი ამბავია და წარმოიდგინეთ, დებიუტანტისთვის რა იქნება. მშვენიერი სტარტია, ვერაფერს იტყვი. და “საბა” რომ ოცდაორშია, ოცდაორ საათზე, ხომ არ დაგავიწყდათ?

ჟოლოსმურაბიანი ჩაი რომ ზამთარში გემრიელდება, საყოველთაოდ ცნობილია, მაგრამ ფინიკიელ ბლოგერებს უთქვამთ, შემოდგომაზეც გადასარევიაო, ამათ კი ნამდვილად დაეჯერებათ ) ჰოდა, ჩემო კარგებო, დაფაცურდით, საკუჭნაოს თვალი მოავლეთ, ყველაზე საყვარელი მურაბა შეარჩიეთ, ჩაი დააყენეთ, სავარძელში ნებივრად მოკალათდით და ეს წიგნი მოიდეთ გვერდით – ერთ უიქენდს მშვენივრად გაატარებთ, პასუხს ვაგებ.