Molly Bloom's Day™

ადათები ცხოვრებას გვიმსუბუქებენო, წერია ამ წიგნში.

გვიმსუბუქებენ და თანაც როგორ – მოკალათდი საკუთარ ნაჭუჭში, მოიქეცი ისე, როგორც უხსოვარი დროიდან იქცეოდნენ შენი წინაპრები, ღმერთი არ გაგიწყრეს, გატკეპნილი ბილიკიდან არ გადაუხვიო და ყველაფერი რიგზე იქნება; რეპუტაცია შეუბღალავი დარჩება, კარიერა შეუფერხებლად აუყვება აღმართს, პატივისცემა და მოწიწება არ მოგაკლდება. არც შური და ბოღმა, სხვათა შორის.

ოღონდ, ჯვარი გწერია და, თუ ამ ნიჟარაში სული შეგეხუთა, თუ ჩარჩო მხრებით გამოანგრიე და ჰაერი ღრმად ჩაისუნთქე, ისეთ ქვათაცვენაში მოჰყვები, მტრისას და ავისას.

მერე რა, თუ ამ ჰაერს მელანი ისააქსის ნორჩი სხეულის თავბრუდამხვევი სურნელი აქვს.

მერე რა, თუ “მასში რაღაც აფროდიტეს, ქაფიანი ქალღმერთის, თრთოლის მსგავსი იგრძნობა?!”

არ გაბედო და არ დაივიწყო, რომ შენ პროფესორი დევიდ ლური ხარ, რესპექტაბელური პიროვნება, საზოგადოების გამორჩეული წევრი, და ზნეობრივი ნორმების დაცვაც განსაკუთრებული სიმკაცრით მოგეთხოვება.

შენ რა, შექსპირის სონეტებით და დანტეს ციტატებით იმისთვის ლაპარაკობ, რომ ოცდაათი წლით უმცროს გოგოს დაახვიო თავბრუ?!

დავიჯერო, მაღალზნეობრივი მოქალაქეების აღშფოთებული შეძახილები არ გესმის?!

არ გაბედო-მეთქი!

და თუ მაინც გაბედავ…

ვაი, შენი ბრალი!

ვინ გაპატიებს, ვინ შეგარჩენს, რომ ასეთი სხვანაირი ხარ, ასეთი თავხედი და უტიფარი?!

ვინ მოგითმენს, ჭუპრივით რომ გამოძვერი პარკიდან, ყველა წესი და კანონი ფეხებზე დაიკიდე, მორალური პრინციპები და ფასეულობები ხუხულასავით მიანგრ-მოანგრიე და, საერთოდ, ვინ მოგცა უფლება, სხვებისგან გამორჩეული ყოფილიყავი?!

ამას როგორ გადაყლაპავს ღირსეული და თავმოყვარე საზოგადოება?!

ხომ გაგიგონია, რასაც დასთეს, იმას მოიმკიო; ჰოდა, კეთილი ინებე, მიიღე, რაც დაიმსახურე.

ვირზე შეგსვამენ, სოფელ-სოფელ ჩამოგატარებენ და არც ლაფს დაიშურებენ. მადლობა თქვი, ქვებით თუ არ ამოგხადეს სული.

გადაიკარგე მერე სადღაც, ფერმაში, შენს ლესბოსელ ქალიშვილთან, და ილოკე იქ იარები მაწანწალა ძაღლივით, ახია შენზე!

შენს ამბავს კი ჯონ კუტზეე მოგვიყვება – ნობელის პრემიის სამხრეთაფრიკელი ლაურეატი, პროზაიკოსი, ესეისტი და ლინგვისტი.

ეს სასოწარკვეთილებით, ნდომით, სირცხვილითა და შავი კონტინენტის სურნელით გაჯერებული ამბავი იქნება.

ამბავი იმისა, როგორ უსწორდება საზოგადოება მათ, ვისაც გამბედაობა ეყო, სხვანაირი ყოფილიყო.

ვინც დოგმები განზე გასწია და სიცოცხლით ტკბობა მოინდომა.

ვისაც არ უნდოდა, მაღალზნეობრივი და სპეტაკი დარჩენილიყო. არ უნდოდა ან უბრალოდ არ შეეძლო.

კარგი წიგნი გამოვა.

წიგნი, რომელიც ყველა ნამდვილი ბიბლიოფილის თაროზე დაიდებს ბინას.

თაროზეც და გულშიც.