მოლი კითხულობს

« ჯეოპარდი – ბლოგები და ბლოგერები vol. 3

მოლი კითხულობს

დეკემბერი 2, 2011 ავტორი Molly Bloom's Day

კარგად მოგეხსენებათ, მოლი ბლუმი ბლოგის დაარსებიდან დღემდე სტუმრებს უკვე წაკითხული და მოწონებული წიგნების შესახებ უამბობდა. ახლა კი ოდნავ განსხვავებული პოსტის დაწერა მაქვს განზრახული.

Must read პრინციპის მომხრე არასოდეს ვყოფილვარ და ამ მხრივ არც განსაკუთრებული თანმიმდევრობა მაქვს დადგენილი, მაგრამ ორიოდე დღის წინ ჭიამაიას წამოწყებული თეგ-თამაში იმდენად მომეწონა, რომ გადავწყვიტე, იმ ათი წიგნის შესახებ გიამბოთ, რომელთა წაკითხვასაც უახლოეს მომავალში ვგეგმავ.

იმით დავიწყებ, რომ საერთოდ, პოსტმოდერნიზმი მიყვარს, განსაკუთრებით კი “თურქი უმბერტო ეკოს” შესრულებით. ამიტომ ორჰან ფამუქის “თოვლს” დიდი ინტერესით ველოდებოდი. მეორე დღეა, თაროზე მიდევს და ხელსაყრელ დროს ვარჩევ – ასეთი წიგნები ნება-ნება უნდა დააგემოვნო.

უკვე რამდენჯერმე მოვისმინე, როგორ აქებდნენ ოსნე საიეშტადის “ქაბულელ წიგნებით მოვაჭრეს” ადამიანები, რომელთა ლიტერატურულ გემოვნებას ნამდვილად ვენდობი. ფემინიზმში ნუ ჩამითვლით და ქალთა უფლებებზე დაწერილ წიგნებს ყოველთვის ყურადღებით ვკითხულობ. ვნახოთ, შეძლო თუ არა სტერეოტიპებისგან გაქცევა ნორვეგიელმა ავტორმა.

კურტ ვონეგუტის “სასაკლაო #5 ანუ ბავშვთა ჯვაროსნული ლაშქრობა” 1945 წელს, ბრიტანელების მიერ დრეზდენის დაბომბვას ეხება. მეორე მსოფლიო ომის თემა ყოველთვის მიზიდავდა და ვონეგუტი ამას კარგად რომ დაწერდა, ეჭვიც არ მეპარება.

ვისაც “გრძელფეხება მამილო” ახსოვს, არც მისი მთავარი გმირი დაავიწყდებოდა – საოცრად საყვარელი, ობოლი გოგო ჯუდი. ჰოდა, ეს ჯუდი კოლეჯში სწავლისას აღმოაჩენს, რომ ერთადერთია, ვინც ლუიზა ოლკოტის “პატარა ქალბატონებზე” არ აღზრდილა. ცუდი არ იქნება, მეც ვიცოდე, რას უკითხავდნენ კეთილშობილ ქალიშვილებს ვიქტორიანულ ეპოქაში.

მოსკოვიდან საჩუქრად ჩამოტანილი, ჯანი როდარის ფერადი და მხიარული “ჩიპოლინოს თავგადასავალი”, ჯერ კიდევ პირველკლასელმა, ლამის ზეპირად ვისწავლე და ამ სიაში ნამდვილად ვერ მოხვდებოდა, მაგრამ, სულ ახლახანს, ნოდარ ლადარიას უგემრიელესი ქართული თარგმანი ჩამივარდა ხელთ. პირველი გვერდები გადავათვალიერე და ისეთი კარგია, რომ ერთ კვირა დღეს აუცილებლად დავუთმობ.

არანაირი გარანტია არ არსებობს, რომ დიდი რეჟისორის ან ცნობილი ტელეწამყვანის დაწერილი წიგნი ასევე წარმატებული გამოვა, თუმცა რატომღაც მჯერა, რომ ლარი კინგის “როგორ ვესაუბროთ ვისაც გნებავთ, როცა გნებავთ და სადაც გნებავთ” ერთ საღამოს მაინც სასიამოვნოდ გამატარებინებს.

არტურო პერეს-რევერტეს მიმართ ჩემი განსაკუთრებული დამოკიდებულების შესახებ მკითხველს კარგად მოეხსენება. ამჟამინდელი სამიზნე კი “ბატალისტია” – სამხედრო ფოტოგრაფისა და ხორვატი ჯარისკაცის თვალით დანახული ომის შემზარავი ანატომია.

ელიზაბეტ სტრაუტს “ამერიკელ ჩეხოვს” უწოდებენ და ჩემთვის ეს უკვე სტიმულია საიმისოდ, რომ მისი შემოქმედებით დავინტერესდე. როგორც ვიცი, “ოლივია კიტერიჯი” რთული და დახვეწილი ფსიქოლოგიური პასაჟებით დატვირთული წიგნია და ვფიქრობ, იმედს არ გამიცრუებს.

თანამედროვე ელექტრონული ბიბლიოთეკების წყალობით, ფანტასტიკის მოყვარულებს, გემრიელი სასუსნავის ისეთი არჩევანი აქვთ, რომ შეიძლება, დაიბნე კიდეც. მე კი “ქინდლში” კომედიური ფენტეზის მეტრის – ტერი პრატჩეტის “კუდიანები საზღვრებს გადადიან” მელოდება.

მახსოვს, თავის დროზე, ლიტერატურულმა “ბონდიანამ” დიდად არ მომხიბლა, მაგრამ მგონია, რომ ჯეფრი დივერის მიერ იან ფლემინგის ფონდის შეკვეთით დაწერილი “კარტ ბლანში” აგენტ 007-ის ძველ ფათერაკებზე ბევრად უკეთესი საკითხავი იქნება.

აი, ასეთია ჩემი დეკემბრის ლიტერატურული პროგრამა-მინიმუმი. ამ წიგნებს უახლოეს ხანებში წავიკითხავ და თუ რომელიმე მათგანი განსაკუთრებით მომეწონა, სპეციალურ პოსტსაც არ დაგზარდებით.

Posted in თეგ-თამაშები, მოლის ბიბლიოთეკა | Tagged არტურო პერეს-რევერტე, ელიზაბეტ სტრაუტი, თოვლი, კურტ ვონეგუტი, ლარი კინგი, ლუიზა ოლკოტი, მოლის ბიბლიოთეკა, ორჰან ფამუქი, ოსნე საიეშტადი, პროზა, ტერი პრატჩეტი, ქაბულელ წიგნებით მოვაჭრე, ქართული თარგმანი, ჭიამაია, ჯანი როდარი, ჯეიმს ბონდი, ჯეფრი დივერი | 78 Comments

78 Responses

on დეკემბერი 2, 2011 at 12:51 AM | პასუხი katerina

მე გული დამწყდა, რომ ასეთი სიხშირით ვერ ვახერხებ კითხვას… დაველოდები აბა მოწონებულ წიგნებზე პოსტებს :)

LikeLike
- on დეკემბერი 2, 2011 at 1:42 AM | პასუხი მოლი ბლუმი
  
  მე მოცლილი ვარ :) :)
  
  LikeLike
  - on დეკემბერი 2, 2011 at 11:55 AM | პასუხი katerina
    
    არა, მოცლილი არ ხარ, კარგი გოგო ხარ… მე ეტყობა გავფუჭდი ან საწუთროს პრობლემებმა გამაფუჭა და იმდენ დროს ვეღარ ვუთმობ კითხვას… თანაც დღის მანძილზე იმდენი წერა-კითხვა მაქვს, რომ 50 ტესტის და ათეულობით თემის გასწორების მერე, ასოების დანახვაზე გული მერევა საღამოობით… მაინც კი ვახერხებ, არც მასეა საქმე, მაგრამ ისე ვერა, როგორც მინდა :)
    
    LikeLike
    - on დეკემბერი 2, 2011 at 12:00 PM მერი პოპინსი
      
      მოლი ჯერ ისევ ბავშვია სულით :) მე ვეღარ ვარ ისეთი აქტიური მკითხველი, როგორიც ოდესღაც ვიყავი.
      
      LikeLike
    - on დეკემბერი 2, 2011 at 12:23 PM მოლი ბლუმი
      
      კი კი კი :) :) და ძალიანაც მიხარია, რომ ასეა. ბავშვურ ნაწილს მთელი ძალებით ვინარჩუნებ :)
      
      LikeLike
    - on დეკემბერი 2, 2011 at 12:22 PM მოლი ბლუმი
      
      ერთი საშუალო ვულგარულობის ანეკდოტური ფრაზა არსებობს: ყველაზე ცოდო ამქვეყნად სექსოლოგი მამაკაცები და მარკეტოლოგი ქალები არიანო. პირველებს სექსი აღარ აინტერესებთ და მეორეეებს – შოპინგიო. ძნელია, გატაცებით იკითხო, როდესაც კითხვა პროფესიის ნაწილი და სამსახურებრივი ვალდებულებაა…
      
      LikeLike
    - on დეკემბერი 3, 2011 at 12:28 AM tamara
      
      მოწოდებით მარკეტოლოგი ვყოფილვარ ;)
      
      LikeLike
    - on დეკემბერი 3, 2011 at 12:30 AM მოლი ბლუმი
      
      მე პირიქით :)
      
      LikeLike
on დეკემბერი 2, 2011 at 12:55 AM | პასუხი tamara

რა საინტერესო სიაა, და რაც მთავარია, ძალიან უცხო :)

LikeLike
- on დეკემბერი 2, 2011 at 1:05 AM | პასუხი მოლი ბლუმი
  
  ჩემთვისაც უცხო და ახალია, თამარა. იმიტომაც მომწონს :)
  
  LikeLike
on დეკემბერი 2, 2011 at 1:17 AM | პასუხი ჩორვენი

ოოჰ

LikeLike
- on დეკემბერი 2, 2011 at 1:26 AM | პასუხი მოლი ბლუმი
  
  ბატალისტი, არა? :)
  
  LikeLike
on დეკემბერი 2, 2011 at 1:32 AM | პასუხი faifuris angelozi

ფამუქის “თოვლი” და რევერტეს “ბატალისტი” უნდა ვიყიდო,ხო ჩიპოლინოს ნათლულს წავუღებ,მახსოვს მირჩიე კარგიაო.

LikeLike
- on დეკემბერი 2, 2011 at 1:34 AM | პასუხი მოლი ბლუმი
  
  ჩიპოლინო ნებისმიერ შემთხვევაში კარგია. და ეს მთლიანად გადმოქართულებული, ღრმად ორიგინალური ვერსიაა. პირველი თავი ასეა და ალბათ, ბოლომდეც ასე გაგრძელდება.
  
  LikeLike
on დეკემბერი 2, 2011 at 9:27 AM | პასუხი გლეხის ბიჭი

მშვენიერი პროგრამაა, მოლ. რევერტესა და ფამუქს ვისურვებდი ახლა ყველაზე მეტად :)))

LikeLike
- on დეკემბერი 2, 2011 at 10:09 AM | პასუხი მოლი ბლუმი
  
  აჰა :) ორივე საინტერესოა და პრინციპში ვიცი კიდეც, რაც დამხვდება. უსიამოვნო სიურპრიზებს არ ველოდები.
  
  LikeLike
on დეკემბერი 2, 2011 at 10:23 AM | პასუხი finiki

ჭიამაიას პოსტი, რომ წავიკითხე მეც იმდენად მომეწონა იდეა, რომ გადავწყვიტე აუცილებლად შემედგინა 10 წიგნიანი პროგრამა :) ძალიან საინტერესო წიგნები გაქვს შერჩეული მოლი.
ჩემი საშვებულებო წიგნების საკმაოდ დიდი ნაწილი კი შენ ბლოგზე წაკითხული პოსტების დამსახურებით იქნებიან სიაში.

LikeLike
- on დეკემბერი 2, 2011 at 10:37 AM | პასუხი მოლი ბლუმი
  
  შვებულება “ძელო სვიატოე” და საშვებულებო წიგნს აქაური პოსტების გათვალისწინებით თუ არჩევ, ფინიკი, ეს ბლოგისთვის საუკეთესო კომპლიმენტია :)
  
  LikeLike
on დეკემბერი 2, 2011 at 10:32 AM | პასუხი mecmikvarkhar

“ქაბულელი წიგნებით მოვაჭრე” მეც ბევრმა სანდო გემოვნების ადამიანმა მირჩია, მაგრამ ვერა და ვერ მოვიხელთე ეგ წიგნი.
ფამუქი იმდენად გემრიელია, რომ ამ ცივ ზამთარში მის “თოვლზე” უკეთესი რა უნდა წაიკითხო, მეც ვაპირებ ყიდვას ამ დღეებში :)
ინგმარ ბერგმანი მაქვს კიდევ გეგმაში აუცილებლად :)
ალკოტს რომ წაიკითხავ მერე ფილმებიც ნახე, რამდენჯერმეა ეკრანიზებული, საკმაოდ სასიამოვნო წასაკითხია, როგორც მახსოვს. მე სტუდენტობისას წამაკითხა ინგლისურად ლექტორმა :)

LikeLike
- on დეკემბერი 2, 2011 at 10:39 AM | პასუხი მოლი ბლუმი
  
  ლატერნა მაგიკა მეც მინდა. და ალკოტს ფილმებსაც დავაყოლებ. მიყვარს ასეთი ექსპერიმენტები. წიგნები და ეკრანიზაცია ერთად.
  
  LikeLike
on დეკემბერი 2, 2011 at 11:05 AM | პასუხი ლიკა ჩაფიძე

“ქაბულელი წიგნით მოვაჭრე”-ს მეც გირჩევთ. მახსოვს 2007 წლის ზამთარში შვედეთში ყოფნის დროს შვედურად წავიკითხე ეს წიგნი და იმდენად მომეწონა, მინდოდა ყველასთვის გამეზიარებინა ჩემი აზრი, მაგრამ მაშინ ამ წიგნზე მგონი მხოლოდ სკანდინავიაში იცოდნენ, თან ძალიან სკანდალურადაც, რადგან სწორედ იმ დროს ავტორსა და წიგნის მთავარი გმირს (თუმცა გმირების სახელები შეცვლილია) შორის სასამართლო განხილვა მიმდინარეობდა. წიგნში რეალური ადამიანების ისტორიაა გადმოცემული. ავტორი, როგორც თავად ამბობდა, წინასწარ შეუთანხმა მათ, რომ წიგნის დაწერა სურდა და არც ისინი წასულან წინააღმდეგნი, მაგრამ წიგნის გამოსვლისა და ასეთი პოპულარობის შემდეგ, ალბათ სარგებლის შოვნით აღტკინებულმა გმირმა ავტორს სასამრთლოში უჩივლა და როგორც ვიცი, ამაოდ..

ავღანეთსა და ავღანელი ხალხის ყოფა-ცხოვრებაზე უკვე საკმაოდ ბევრი წიგნი წავიკითხე და მათ შორის ეს ყველაზე მეტად მომეწონა და ყველაზე მეტად ალბათ სწორედ ქალთა უფლებებისა და მათი მძიმე ყოფის ამგვარი გაგებით აღწერის გამო.. ფემინისტი არც მე ვარ, მაგრამ ამ წიგნის წაკითხვის შემდეგ, ძნელია ზოგ-ზოგიერთი უტიფარი მუტრუკის მიბეგვის სურვილი არ გაგიჩნდეს.. :)
მოკლედ, ჩემი აზრით, ეს წიგნი იძლევა ავღანელი ქალების აუტანელი ყოველდღიურობის და ბურკის ტყვეობაში ცხოვრების ყველაზე სიღრმისეულ აღწერას…

მეორე მიზეზი კი, რატომაც გირჩევთ ამ წიგნს, ის არის, რომ ის ჩემი მეგობრმა და კოლეგამ, თამარ კვიჟინაძემ თარგმნა ნორვეგიულიდან <3

LikeLike
on დეკემბერი 2, 2011 at 11:14 AM | პასუხი ლიკა ჩაფიძე

ხოდა კიდე, ამ წიგნის შემდეგ ავღანეთის თემით ისევ დაინტერესდებით, ამ თვის ბოლომდე ჩემი კიდევ ერთი თარგმანი, საქართველოში შვედეთის ელჩის, დიანა იანსეს, წიგნი “ავღანური დღიურები – ჩემი გულის ერთ ნაწილს აქვ ვტოვებ” გამოდის… თუმცა ეს უკანასკნელი უფრო ავღანეთში მიმდინარეო საომარი ოპერაციების პოლიტაქცენტებზეა, მაგრამ ოსნეს დახატული ავღანური პეიზაჟის შევსებას თუ მოისურვებთ, ნამდვილად გამოგადგებათ ^^

http://swedishintbilisi.blogspot.com/2010/10/blog-post.html

LikeLike
- on დეკემბერი 2, 2011 at 12:25 PM | პასუხი მოლი ბლუმი
  
  აი, კიდევ ერთი მიზეზი, ქაბულელის წასაკითხად.
  
  დიანა იანსეს წიგნსაც მოვიძიებ. ამ ბოლო დროს, მემუარულ ლიტერატურას გემო გავუგე :)
  
  მადლობა, ლიკა, ასეთი ვრცელი კომენტარისთვის რომ მოიცალე.
  
  LikeLike
on დეკემბერი 2, 2011 at 11:47 AM | პასუხი მერი პოპინსი

მოლი, შენ და ჭიამაიას შეგპირდით, რომ ჩემეულ სიასაც მოგაწვდიდით და ვასრულებ დანაპირებს. ჩამონათვალში ზოგი ისეთი წიგნია, რომლის აქამდე წაუკითხაობაც, ალბათ, ჩემს, როგორც მკითხველის იმიჯს, დააზარალებს, მაგრამ გულწრფელი ხომ უნდა ვყოფილიყავი? :)

1. ორჰან ფამუქი – „თოვლი“ (უკვე შინ მაქვს და ხელსაყრელ დროს ველოდები: თოვლიან ამინდს და თბილ, თავისუფალ საღამოს);
2. დენ ბრაუნი – „დაკარგული სიმბოლო“ (ძალიან მიქო ჩემმა მეგობარმა და იმასაც შემპირდა, გათხოვებო);
3. როალდ დალი – „ჩარლი და შოკოლადის ქარხანა“ (რმოლი, ამ წიგნის წაკითხვას მას შემდეგ ვაპირებ, რაც შენი პოსტი ვნახე – „შაშკინი ვილი ვონკას ნაკვალევზე“);
4. კნუტ ჰამსუნი – „მისტერიები“ (კი ვიცი, რომ აქამდე უნდა მქონოდა წაკითხული, მაგრამ… );
5. ზაზა ბურჭულაძე – „გასაბერი ანგელოზი“ („ადიბასი“ იმდენად მომეწონა, რომ ამ წიგნისაგანაც ველოდები რაიმე კარგს);
6. ასტრიდ ლინდგრენი – „კალე ბლუმკვისტი და რასმუსი“ (მე, ლინდგრენის მხურვალე თაყვანისმცემელმა, სულ ახლახანს გავიგე, რომ ასეთი წიგნი არსებობს!);
7. მილან კუნდერა – „გამოსათხოვარი ვალსი“ (მიყვარს კუნდერა და ამ წიგნის იმედიც მაქვს :) );
8. ოსნე საიეშტადი – „ქაბულელი წიგნებით მოვაჭრე“ (ისედაც ვაპირებდი და შენმა რეკომენდაციამ უფრო გადამაწყვეტინა ამ ნაწარმოების სიაში შეტანა, მოლი);
9. ჯეიმს პატერსონი – „მეექვსე სამიზნე“ (მიყვარს დეტექტივები და პატერსონის ეს სერიაც);
10. ტრუმენ კეპოტე – „საუზმე ტიფანისთან“ (ახლა ზუსტად ვიცი, რომ ჩემი რეპუტაცია დასამარდა, მაგრამ არ მაქვს წაკითხული და რა ვქნა :().

P.S. ისე, სხვა მკითხველებიც თუ გაგვიზიარებენ ბიბლიოფილურ გეგმებს, არ იქნება ურიგო, არა?
P.P.S. კომენტარის ნაცვლად პოსტი გამომივიდა!

LikeLike
- on დეკემბერი 2, 2011 at 12:34 PM | პასუხი მოლი ბლუმი
  
  ნამდვილად პოსტია :) და მერე რა საინტერესო :) მადლობა, მერი.
  
  დაკარგულ სიმბოლოს მეც გირჩევ – საინტერესო საკითხავია, გაერთობი.
  
  პატერსონს საფუძვლიანად ახლა ვსწავლობ (მადლობა ქინდლს). ლორდიც აქებდა, თუ გახსოვს.
  
  ასტრიდზე, დალის შოკოლადის ქარხანაზე და ზაზას წიგნებზე ჩემი აზრი კი იცი შენ.
  
  კუნდერას “ვალსზე” მეტად უფრო “ყოფიერების აუტანელი სიმსუბუქე” მომწონს. ჰამსუნის “მისტერიები” თავის დროზე, შიმშილთან ერთად, რუსულად წავიკითხე. ახლა ახალი ქართული თარგმანიც გვაქვს.
  
  კაპოტეს, სულ რომ გავეშვათ ყველაფერს, ოდრის ხათრით წაიკითხავს კაცი…
  
  ერთი სიტყვით, მშვენიერი სიაა :)
  
  LikeLike
on დეკემბერი 2, 2011 at 11:54 AM | პასუხი orange

მეც წავიკითხავ, როგორც კი შევძლებ, ბოლო დროს ნამეტანი დაკავებული ვარ… შემოვეხეტე აქ და მეამა <3 ახლა წინა პოსტზეც გადავალ :)

LikeLike
on დეკემბერი 2, 2011 at 12:21 PM | პასუხი taledream

მე თუ გამოვნახავ დროს და წიგნებს მთელი ჩემი სია მოლის და კეჟერაძის დამსახურებით იქნება შედგენილი. :)
და ძალიან კარგი იდეაა ნათლულისთვის ჩიპოლინოს ჩუქება, მართალია ჯერ ძალიან პატარაა მაგრამ იმედია ისევე მოეწონება როგორც მე :) მადლობა მოლის და ფაიფურის ანგელოზს :) :) :)

LikeLike
- on დეკემბერი 2, 2011 at 12:26 PM | პასუხი მოლი ბლუმი
  
  ჩიპოლინო ისეთი წიგნია, რაც მალე წაიკითხავ, მით უკეთესი.
  
  თან ქართულია, მშვენიერი ილუსტრაციებით. ერთი სიტყვით, პატარა მკითხველისთვის ზედგამოჭრილია და საუკეთესო საჩუქარიც.
  
  LikeLike
  - on დეკემბერი 2, 2011 at 5:20 PM | პასუხი taledream
    
    :) შენ ისე აქე რომ ჩუქებამდე მეც გადავავლებ თვალს ახალ თარგმანს :)
    
    LikeLike
    - on დეკემბერი 2, 2011 at 5:22 PM მოლი ბლუმი
      
      ორიგინალური თარგმანია. სრულად გადმოქართულებული. სახელებიც კი. პირველი გვერდების მიხედვით, მართლა გემრიელობაა… გადახედე, ასეთი საბავშვო წიგნი დიდებსაც არაფერს აწყენს, უფრო პირიქით…
      
      LikeLike
on დეკემბერი 2, 2011 at 12:37 PM | პასუხი Tako Gakhokidze

Little Women- ამის წაკითხვა ბავშვობიდან მინდა. პატარა ვიყავი ფილმს რომ ვუყურე და ძალიან მომეწონა :) ფამუქის “მე წითელი მქვია” დამამთავრებია ნეტავ როდესმე :(
პერეს რევერტე არ წამიკითხავს არასდროს, ძალიან მინდა დავიწყო მისი კითხვა :)

LikeLike
- on დეკემბერი 2, 2011 at 12:43 PM | პასუხი მოლი ბლუმი
  
  ფლამანდური დაფით დაიწყე. კლასიკაა :)
  
  წითელი არ მოგეწონა?
  
  LikeLike
  - on დეკემბერი 2, 2011 at 12:45 PM | პასუხი მერი პოპინსი
    
    “ფლამანდური დაფა” საუკეთესო რევერტეა :) და “სევილიური ზიარება”.
    
    LikeLike
    - on დეკემბერი 2, 2011 at 12:47 PM მოლი ბლუმი
      
      კომანჩების ტერიტორიაც და დიუმას კლუბიც.
      
      LikeLike
on დეკემბერი 2, 2011 at 1:03 PM | პასუხი Tako Gakhokidze

ფლამანდურ დაფაზე ფილმი მაქვს ნანახი და ძალიან მომეწონა :) გული ვერ დავუდე წითელს, ცუდ პერიოდში ვკითხულობდი, უნდა ჩავუჯდე ხელახლა :)

LikeLike
on დეკემბერი 2, 2011 at 1:04 PM | პასუხი Chiamaria

შერცხვენილი ვარ მთელი ბლოგოსფეროს მასშტაბით და რატომ ეხლა. არცერთი ეს წიგნი, (ერთი–ორი გამონაკლისის გარდა) არ ვიცი…
ოსნე საიეშტადის “ქაბულელ წიგნებით მოვაჭრეს” მეც სიამოვნებით წავიკითხავდი.
წავიკითხავდი ლუიზა ოლკოტის “პატარა ქალბატონებს”… ღმერთო, რატომ არ იქნება უფრო მეტი საათი დღე–ღამეში ვიდრე 24–ია :(

LikeLike
- on დეკემბერი 2, 2011 at 1:16 PM | პასუხი მოლი ბლუმი
  
  48 საათიც არ გვეყოფოდა, ჭიამაია :( საშინლად ცოტაა დრო :(
  
  LikeLike
on დეკემბერი 2, 2011 at 1:10 PM | პასუხი Tako Gakhokidze

არადა ფილმს Uncovered-ჰქვია და 1 კვიირს წინ გავიგე, რომ პერეს რევერტეს რომანის მიხედვითაა გადაღებული :)) ძალიან მომინდა წაკითხვა :))

LikeLike
- on დეკემბერი 2, 2011 at 1:15 PM | პასუხი მოლი ბლუმი
  
  ყველა წიგნს (გენიალურსაც კი) თავისი დრო აქვს და სათანადო განწყობა სჭირდება. გადადე გვერდზე, ნუ დაასრულებ და მოგვიანებით ჩაუჯექი. სად გეჩქარება…
  
  Uncovered მეც არ გამიგია. მადლობა :) დღესვე მოვიძიებ ტორენტებზე.
  
  შენ პოლანსკის მეცხრე კარიბჭე გექნება ნანახი. ესეც რევერტეა, დიუმას კლუბი.
  
  LikeLike
on დეკემბერი 2, 2011 at 1:13 PM | პასუხი Tako Gakhokidze

“პატარა ქალები” წიგნი იშოვება? ძალიან მომინდა წაკითხვა. Friends-ში რეიჩელი არწმუნებს ჯოს რომ წაიკითხოს ეს წიგნი, თვითონ კიდევ კინგის “ნათებას” კითხულობს ჯოს ხათრით, კარგი სერიაა :)

LikeLike
- on დეკემბერი 2, 2011 at 1:19 PM | პასუხი მოლი ბლუმი
  
  ქართულად, შედარებით ძველი, 2005 წლის გამოცემა არსებობს. არც თუ ცნობილი გამომცემლობისაა. ხარისხზე ვერაფერს გეტყვი.
  
  ყოჩაღ ჯოს და რეიჩელს :)
  
  LikeLike
on დეკემბერი 2, 2011 at 1:19 PM | პასუხი Tako Gakhokidze

ესეც არ ვიცოდი, წავალ პერეს რევერტეს ჩავუჯდები :)

LikeLike
- on დეკემბერი 2, 2011 at 1:22 PM | პასუხი მოლი ბლუმი
  
  კიდევ “სამხრეთის დედოფალი” არსებობს, ოღონდ, მაგას ვერ გირჩევ. სერიალია (ამ სიტყვის ყველაზე ცუდი გაგებით).
  
  LikeLike
on დეკემბერი 2, 2011 at 3:26 PM | პასუხი Tako Gakhokidze

Rustavi 2-ზე რომ გადის პერეს რევერტეს ნაწარმოების მიხედვითაა?

LikeLike
- on დეკემბერი 2, 2011 at 3:31 PM | პასუხი მოლი ბლუმი
  
  კი :( გახლავთ. არადა, რომანი მშვენიერია.
  
  LikeLike
on დეკემბერი 2, 2011 at 3:27 PM | პასუხი nancygaladriel

უხ რამდენი ხანია არაფერი არ წამიკითხვას.მომინდა ახლა…
შენს ბლოგზეც ზამთარია უკვე <3

LikeLike
- on დეკემბერი 2, 2011 at 3:32 PM | პასუხი მოლი ბლუმი
  
  აბითურიენტობის მთავარი მინუსი – დრო არაფრისთვის გრჩება…
  
  კი, აქაც დაზამთრდა :) შენთანაც ხომ თოვს?
  
  LikeLike
on დეკემბერი 2, 2011 at 4:43 PM | პასუხი Kejeradze

ფამუქის , რევერტეს, ვონეგუტის და საიეშტადის ხსენებულ ნაწარმოებებს სიამოვნებით წავიკითხავდი, მაგრამ “რიგი” კითხვის ტემპზე სწრაფად იზრდება. 24 საათი აშკარად არ არის საკმარისი :D

LikeLike
- on დეკემბერი 2, 2011 at 4:49 PM | პასუხი მოლი ბლუმი
  
  არ თქვა :( არც კითხვისთვის და არც ძილისთვის :(
  
  LikeLike
on დეკემბერი 2, 2011 at 4:50 PM | პასუხი tsotnee

მე რაღა ვთქვა?! ქეთის არ იყოს მეც დაველოდები პოსტებს მოწონებულ წიგნებზე. :) :) :) ხო მაქვს ნათქვამი და კიდევ ერთხელ ძალიან მიყვარს შენი ბლოგი! უკვე მერამდენე წიგნი აღმოვაჩინე! :) :) :)

LikeLike
- on დეკემბერი 2, 2011 at 5:06 PM | პასუხი მოლი ბლუმი
  
  მეც მიყვარს ასეთი დაინტერესებული მკითხველი :)
  
  LikeLike
  - on დეკემბერი 2, 2011 at 7:42 PM | პასუხი tsotnee
    
    :) :) :)
    
    LikeLike
on დეკემბერი 2, 2011 at 6:18 PM | პასუხი vasasi

ფამუქი ვიყიდე!.

LikeLike
- on დეკემბერი 2, 2011 at 7:23 PM | პასუხი მოლი ბლუმი
  
  მშვიდობაში და კითხვით გაცვეთაში!
  
  მერე შენი იმპრესიებიც გაგვაგებინე.
  
  LikeLike
on დეკემბერი 2, 2011 at 7:53 PM | პასუხი glamtaia

დავაძრე ბლოკნოტი და მივამატე სიას . . . ისე ეს მეც უნდა დავწერო . . . საინტერესო თეგ-თამაშია.

LikeLike
- on დეკემბერი 2, 2011 at 7:58 PM | პასუხი მოლი ბლუმი
  
  არ გადადო. აუცილებლად დაწერე.
  
  LikeLike
  - on დეკემბერი 2, 2011 at 8:01 PM | პასუხი glamtaia
    
    20 წუთში მზად იქნება :)
    
    LikeLike
    - on დეკემბერი 2, 2011 at 8:03 PM მოლი ბლუმი
      
      უკვე? რა მაგრობაა :)
      
      LikeLike
on დეკემბერი 2, 2011 at 8:06 PM | პასუხი anoonymouss

წიგნთა ჩამონათვალს თვალი გადავავლე და ვეცდები რამდენიმე მათგანი ჩემს ათეულშიც აღმოჩნდეს.. (მოლი პირობის შესრულებას დღეიდან ვიწყებ შენს ბლოგზე) :D

LikeLike
- on დეკემბერი 2, 2011 at 8:10 PM | პასუხი მოლი ბლუმი
  
  ანუ, შენც წერ ათეულს…
  
  არ გამომაპარო ახალი პოსტი.
  
  LikeLike
on დეკემბერი 3, 2011 at 2:30 PM | პასუხი luckiane

moli, momwons sheni axali posti da axali interieri:)

LikeLike
- on დეკემბერი 3, 2011 at 4:49 PM | პასუხი მოლი ბლუმი
  
  თოვლიც, ლუკა? :) ნახე, რა საყვარლად თოვს.
  
  LikeLike
on დეკემბერი 4, 2011 at 7:55 PM | პასუხი »♥» ana «♥«

ქაბულელი წიგნებით მოვაჭრე მეც მაინტერესებს და ვაპირებ წაკითხვას. :)
აი,რამდენიმე ბლოგი შემოვიარე და პოსტები წავიკითხე წიგნებზე და რა თქმა უნდა მათი უმეტესობა კი არა,თითქმის 90% არ მაქვს წაკითხული. :ს მაგრამ რა ვუყო,ვერ მოვასწარი ჯერ-ჯერობით.მხოლოდ მწირი რაოდენობა აღმოჩნდა,რომ ვიცოდი და არ ვიცი,გამოსასწორებელია ჩემი მდგომარეობა. :)

LikeLike
- on დეკემბერი 4, 2011 at 8:03 PM | პასუხი მოლი ბლუმი
  
  ეგ ისეთი პრობლემაა, ანა, რომლის გამოსწორებაც უაღრესად სასიამოვნოა… ასე რომ, გუდ ლაკ. რაც მეტ ახალ წიგნს აღმოაჩენ, მით უკეთესი :)
  
  LikeLike
on დეკემბერი 4, 2011 at 10:02 PM | პასუხი kevana

ამ სიას მე დავიმახსოვრებ ^^

LikeLike
- on დეკემბერი 4, 2011 at 10:07 PM | პასუხი მოლი ბლუმი
  
  ქინდლისთვის გამოგადგება, ქევან. ნახევარზე მეტი ელექტრონულ ფორმატში მაქვს.
  
  LikeLike
on დეკემბერი 5, 2011 at 9:29 PM | პასუხი რუსა

მშვენიერი სიაა და მეც სიამოვნებით წავიკითხავ, არცერთი მათგანი არ მაქვს წაკითხული ჯერ :(
ჭიამაიამ მეც დამთაგა და როგორც კი ბლოგს მოვუხერხებ რამეს დავწერ :)

LikeLike
on დეკემბერი 12, 2011 at 11:41 AM | პასუხი გვირილა

მოლი, “ქაბულელი წიგნებით მოვაჭრე” მე წავიკითხე და კაია, მართლა ;)
ლარი კინგით დავინტერესდი ახლა და მინდა ეგ წიგნი. გამოიცა თუ ელექტრონულია?

LikeLike
- on დეკემბერი 12, 2011 at 1:01 PM | პასუხი მოლი ბლუმი
  
  კინგი ელექტრონული მაქვს, გვირილა. ყოველი შემთხვევისთვის, თბილისში არსად მინახავს და მოსკოვში კი გამოსცემდნენ. თუ მოიცლი, ბმულსაც გადმოგიგდებ.
  
  LikeLike
on დეკემბერი 13, 2011 at 6:38 PM | პასუხი ნაკლული ათეული « faifuris angelozi

[…] რევერტეს “ბატალისტი“-ით, როგორც მოლი ბლუმი ამბობს წიგნი სამხედრო ფოტოგრაფის და […]

LikeLike
on მარტი 28, 2012 at 10:53 PM | პასუხი სანდრო

შენი ნავიგატორიდან ამოვარჩიე რამდენიმე პოსტი და დღეს შენი კითხვის დღე მაქვს, დარწმუნებული ვარ ყველა კარგი წიგნია თან არტურო პერეს-რევერტე ძალიან მაინტერესებს და ქართულად არაა ნათარგნი?

LikeLike
- on მარტი 28, 2012 at 10:55 PM | პასუხი მოლი ბლუმი
  
  წიგნები არა, სანდრო და რამდენიმე მოთხრობა და ესე კი არის ნათარგმნი.
  
  LikeLike
on მარტი 6, 2013 at 12:04 PM | პასუხი kushichka

ლუიზა ოლკოტის “პატარა ქალბატონები” ––––– მოლი ეს წიგნი რომელ ენაზე წაიკითხე და სად იშოვე? ძალიან მინდა… :(

LikeLike
- on მარტი 6, 2013 at 12:11 PM | პასუხი მოლი ბლუმი
  
  წაკითხვით რუსულად წავიკითხე, მაგრამ “დელისთან” ახლოს რომ “ბიბლუსია”, იქ აქვთ ქართულად. საბავშვო-საყმაწვილო წიგნების თაროზე.
  
  LikeLike
  - on მარტი 13, 2013 at 10:11 AM | პასუხი kushichka
    
    მადლობააა <3
    
    LikeLike
    - on მარტი 13, 2013 at 10:35 AM მოლი ბლუმი
      
      არაფრის :)
      
      LikeLike
on აპრილი 13, 2016 at 4:43 PM | პასუხი tsatso

შეგიძლიათ მითხრათ სად შეიძლება ვიპოვო ქაბულელი წიგნებით მოვაჭრე? უამრავ მაღაზიაში დავრეკე და ვიკითხე და არსად არ არის ((( მჭირდება ძალიან ((

LikeLike
- on აპრილი 13, 2016 at 4:48 PM | პასუხი Molly Bloom's Day
  
  2011 წლის გამოცემაა და, შესაძლოა, მაღაზიებში არც იყოს. ტირაჟი ამოიწურებოდა. სულაკაურის გამომცემლობაში იკითხეთ. ზუსტად ეცოდინებათ. გამომცემლობასთან მაღაზიაცაა და თუ დარჩა, მანდ დარჩებოდა.
  
  LikeLike

Comments RSS

კომენტარის დატოვება

Enter your comment here...

Fill in your details below or click an icon to log in:

ელფოსტა (Address never made public)

სახელი

ვებ-საიტი

You are commenting using your WordPress.com account. ( Log Out / შეცვლა )

You are commenting using your Google account. ( Log Out / შეცვლა )

You are commenting using your Twitter account. ( Log Out / შეცვლა )

You are commenting using your Facebook account. ( Log Out / შეცვლა )

გაუქმება

Connecting to %s

This site uses Akismet to reduce spam. Learn how your comment data is processed.

ძიება
კარლსონი ფეისბუქზე
Top posts and pages
Follow Molly Bloom's Day™ on WordPress.com
Follow Us
- Facebook

ბოლო კომენტარები

	tamara კომენტარი Jeopardy! – ჰარი პოტერი და ცეც… ჩანაწერზე
	დიანა კომენტარი მარკ შაგალის სიყვარულის ს… ჩანაწერზე
	სანდრო ვარშანიძე კომენტარი ასტრიდი – ღიმილის ორდენი… ჩანაწერზე
	tamara კომენტარი წიგნების სასაფლაო ჩანაწერზე
	Molly Bloom's Day კომენტარი წიგნების სასაფლაო ჩანაწერზე
	მარი კომენტარი წიგნების სასაფლაო ჩანაწერზე
	ანონიმური კომენტარი ბოცო, გვანცა, ბოლოკა და ყ… ჩანაწერზე
	Molly Bloom's Day კომენტარი ჩემი “მარადისობის კანონი… ჩანაწერზე
	ლალი კომენტარი ჩემი “მარადისობის კანონი… ჩანაწერზე
	Sofiko sordia კომენტარი მულტფილმები, რომლებსაც ვკითხულ… ჩანაწერზე

დეკემბერი 2011

ო ს ო ხ პ კ კ

1 2 3 4

5 6 7 8 9 10 11

12 13 14 15 16 17 18

19 20 21 22 23 24 25

26 27 28 29 30 31

« ნოე იან »
Tag Cloud
"ნაკადული" Molly Bloom's Day non fiction ochobooks XX საუკუნის ფოტოისტორია აკა მორჩილაძე არტი ასტრიდ ლინდგრენი ბათუმი ბაკურ სულაკაურის გამომცემლობა ბიბლიო-სერიები ბიბლუსი ბლოგერი ბლოგი ბლოგინგი ბლოგოსფერო ბორის აკუნინი გამომცემლობა "ინტელექტი" გამომცემლობა "წიგნები ბათუმში" გამომცემლობა არტანუჯი გამომცემლობები და წიგნის მაღაზიები გესტ ჯეოპარდი დეტექტივი დოკუმენტური პროზა ეკა ტაბლიაშვილი ელექტრონული ბიბლიოთეკა ექსპო ჯორჯია ვერანდა ზღაპრები თამაში თანამედროვე ევროპული ლიტერატურა თანამედროვე ქართული ლიტერატურა თბილისის წიგნის საერთაშორისო ფესტივალი კარლსონი კლიché ლინდგრენოლოგია ლიტერატურული კონკურსი ლოგოს პრესი მალხაზ ფაღავა მოლი ბლუმი მოლის ბიბლიოთეკა მოლის საბავშვო ბიბლიოთეკა მოქალაქე ბლუმი მულტფილმები ნატიფი ხელოვნება ნატო დავითაშვილი ნიკა სამუშია ორჰან ფამუქი პალიტრა L პოეზია პრეპრინტი პროზა ჟანრული პროზა საბავშვო ბიბლიოთეკა საბავშვო ლიტერატურა სამეცნიერო ფანტასტიკა სტივენ კინგი უმბერტო ეკო ფანტასტიკა ფეისბუქი ფენტეზი ქართული თარგმანი ქართული პროზა ქარჩხაძის გამომცემლობა ქინდლი შერლოკ ჰოლმსი შვებულება ძველი თარო წიგნები ბათუმში წიგნი წიგნის გამომცემელთა და გამავრცელებელთა ასოციაცია წისქვილი ჯეოპარდი ჯოან როულინგი ჰარი პოტერი
კატეგორიები
- "ნაკადული" (3)
- არტი (62)
- გაბრაზებული მკითხველი (1)
- ვერანდა (24)
- თავჩაქინდლულთა ქრონიკები (10)
- თბილისის წიგნის საერთაშორისო ფესტივალი (37)
- თეგ-თამაშები (4)
- კინოდარბაზი (9)
- კლიché (20)
- ლინდგრენოლოგია (20)
- ლიტერატურული კონკურსები (12)
- მოლი მსოფლიოს გარშემო (5)
- მოლის ბიბლიოთეკა (237)
- მონოლოგები (8)
- მოქალაქე ბლუმი (22)
- მუსიკალური სალონი (4)
- ნატიფი ხელოვნება (32)
- პრეპრინტი (16)
- პროფესია – რეპორტიორი (2)
- ფოტოგრაფია (17)
- ძველი თარო (8)
- წისქვილი (26)
- ხელნაკეთობები (1)
- ჯეოპარდი (87)
- Me (43)
- Molly Bloom's Day (30)
- Molly Bloom's Day-ის სტუმრები (10)
არქივი
- ივნისი 2018 (2)
- მაისი 2018 (5)
- აპრილი 2018 (8)
- მარტი 2018 (7)
- თებერვალი 2018 (7)
- იანვარი 2018 (9)
- დეკემბერი 2017 (7)
- ნოემბერი 2017 (9)
- ოქტომბერი 2017 (9)
- მაისი 2017 (9)
- აპრილი 2017 (8)
- მარტი 2017 (9)
- თებერვალი 2017 (8)
- იანვარი 2017 (8)
- დეკემბერი 2016 (7)
- ნოემბერი 2016 (4)
- ოქტომბერი 2016 (1)
- მაისი 2016 (1)
- იანვარი 2016 (4)
- დეკემბერი 2015 (9)
- ნოემბერი 2015 (9)
- ოქტომბერი 2015 (8)
- ივლისი 2015 (2)
- ივნისი 2015 (6)
- მაისი 2015 (9)
- აპრილი 2015 (8)
- მარტი 2015 (9)
- თებერვალი 2015 (7)
- იანვარი 2015 (9)
- დეკემბერი 2014 (8)
- ნოემბერი 2014 (9)
- ოქტომბერი 2014 (9)
- სექტემბერი 2014 (5)
- ივნისი 2014 (9)
- მაისი 2014 (8)
- აპრილი 2014 (9)
- მარტი 2014 (9)
- თებერვალი 2014 (8)
- იანვარი 2014 (8)
- დეკემბერი 2013 (9)
- ნოემბერი 2013 (8)
- ოქტომბერი 2013 (9)
- სექტემბერი 2013 (8)
- ივლისი 2013 (14)
- ივნისი 2013 (12)
- მაისი 2013 (14)
- აპრილი 2013 (13)
- მარტი 2013 (13)
- თებერვალი 2013 (12)
- იანვარი 2013 (12)
- დეკემბერი 2012 (13)
- ნოემბერი 2012 (13)
- ოქტომბერი 2012 (13)
- სექტემბერი 2012 (10)
- ივლისი 2012 (1)
- ივნისი 2012 (5)
- მაისი 2012 (13)
- აპრილი 2012 (13)
- მარტი 2012 (13)
- თებერვალი 2012 (13)
- იანვარი 2012 (12)
- დეკემბერი 2011 (13)
- ნოემბერი 2011 (13)
- ოქტომბერი 2011 (13)
- სექტემბერი 2011 (13)
- აგვისტო 2011 (1)
- ივლისი 2011 (13)
- ივნისი 2011 (14)
- მაისი 2011 (19)
- აპრილი 2011 (13)
- მარტი 2011 (13)
- თებერვალი 2011 (11)
- იანვარი 2011 (11)
Follow Blog via Email

Enter your email address to follow this blog and receive notifications of new posts by email.

Join 912 other followers

Email Address:
Blog Stats
- 1,235,866 hits

დეკემბერი 2011
ო	ს	ო	ხ	პ	კ	კ
			1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28	29	30	31

Molly Bloom's Day™

ასტრიდ ლინდგრენი – 111