Molly Bloom's Day™

თვენახევრის წინ, ბლოგოსფეროს აღიარებულმა ექსპერტმა და ფანტასტიკის დიდმა მოყვარულმა ლორდ ვეიდერმა შოტლანდიელი ლიტერატორის დეივიდ ფრინგლის მიერ შედგენილი ასი საუკეთესი Sci Fi ნაწარმოების სია გამოაქვეყნა და საკუთარი კომენტარებიც დაურთო.

მოლი ბლუმის ბლოგის მკითხველებს ფანტასტიკური ლიტერატურის მიმართ ჩემი განსაკუთრებული დამოკიდებულების შესახებ კარგად მოეხსენებათ  – ჟანრის გულმხურვალე  თაყვანისმცემელი გახლავართ. ამას წინათ ქართული ფანტასტიკის პრობლემებზე ვწერდი. კომენტარების რაოდენობამ და შინაარსმა კიდევ ერთხელ დამარწმუნა, რომ ქართველ მკითხველთა შორის Sci Fi და ფენტეზი ფრიად პოპულარულია. არც მაესტრო ფრინგლისთან გაჯიბრებას ვაპირებ და არც ფუნდამენტური მიმოხილვის დაწერა მიფიქრია, მაგრამ მინდა, ჩემს მკითხველს პირად იმპრესიებზე აგებული  ფანტასტიკური (ყველა გაგებით) ტოპ-ოცეული შევთავაზო, რომელიც ასე გამოიყურება: 

რეი ბრედბერი. “მარსის ქრონიკები”;
ჯონ ტოლკინი. “ბეჭდების მბრძანებელი”;
აიზეკ აზიმოვი. “მე, რობოტი”;
ურსულა ლე გუინი. “წყვდიადის მარცხენა ხელი”;
სტანისლავ ლემი. “სოლარისი”;
კლაივ სტეიპლ ლუისი. “ნარნიას ქრონიკები”;
რობერტ შეკლი. “აბსოლუტური იარაღი”;
ჯოან როულინგი. პოტერიადა;
არტურ კლარკი. “2001: კოსმოსური ოდისეა”;
როჯერ ზელაზნი. “ამბერის ქრონიკები”;
არკადი და ბორის სტრუგაცკები. “პიკნიკი გზის პირას”;
ტერი პრატჩეტი. “მაგიის ფერი”;
კლიფორდ საიმაკი. “ყველა სხეული ბალახია”
სერგეი ლუკიანენკო. “ღამის გუშაგი”;
ალფრედ ბესტერი. “გაქრობის ფენომენი”;
რობერტ ასპრინი. “მითები”;
პიერ ბული. “მაიმუნების პლანეტა”;
პოლ ანდერსონი. “ოპერაცია “ქაოსი”;
რობერტ ჰაინლაინი. “ორმაგი ვარსკვლავი”;
რობერტ სილვერბერგი. “მეფე გილგამეში”.

რიგითობა, რა თქმა უნდა, პირობითია, თუმცა, უბრალოდ, არ შემეძლო, სიის თავში რეი ბრედბერის ყველაზე ცნობილი ნაწარმოები არ მომექცია. “მარსის ქრონიკები”, ჩემი მოკრძალებული აზრით, გაცილებით მეტია, ვიდრე თუნდაც საუკეთესო ფანტასტიკური რომანი… სამოცდაერთი წლის წინ დაწერილი წიგნი ახლაც ერთი ამოსუნთქვით იკითხება და პრობლემები, რომლებსაც ბრედბერის გმირები აწყდებიან, დღესაც აქტუალურია.

 

საბჭოთა პერიოდის ფანტასტიკურ ლიტერატურას ბევრი ზედმეტად იდეოლოგიზირებასა და სიუჟეტების სიმწირეში ადანაშაულებს. ბუნებრივია, იმ დროს ალექსანდრ ბელიაევის უსახური, წითლად შეფერილი  კვაზი-ფანტასტიკური ნაწარმოებებიც იწერებოდა და სერგეი აბრამოვის უფერული და მოსაწყენი მოთხრობებიც;  არც იმაზე ვდაობ, რომ სოციალისტური Sci Fi ამერიკული გაქანებით ვერ დაიკვეხნიდა, მაგრამ ძმები სტრუგაცკების რამდენიმე რომანი ჟანრის დასავლელი კლასიკოსების შედევრებს არაფრით ჩამოუვარდება.

 

მათ, ვინც ფანტასტიკას “არასერიოზულ” ლიტერატურად მიიჩნევს, შევახსენებ, რომ ანდრეი ტარკოვსკის ორი კინოშედევრი – “სტალკერი” და “სოლარისი” – ზუსტადაც რომ სტრუგაცკების და სტანისლავ ლემის  რომანების მიხედვით არის შექმნილი; არა მგონია, მათ მხატვრულ ღირებულებას ვინმე ეჭვქვეშ აყენებდეს, ფრანსუა ტრიუფოს “ფარენჰეიტზე” და კლარკის “ოდისეის”  კუბრიკისეულ ეკრანიზაციაზე აღარაფერს ვიტყვი – ხელშეუხებელი კინოკლასიკაა.

 

სერგეი ლუკიანენკოს “გუშაგების” სერია უპირველესად, იშვიათი დეტალიზაციით და ფენტეზი-სამყაროს დასრულებული გეომეტრიით იქცევს ყურადღებას, ამ ფონზე კი სერიის პირველი ორი წიგნის მიხედვით, მოდური რეჟისორის – თემურ ბეკმამბეტოვის  გადაღებული ღრმად კომერციული ფილმები მხოლოდ დასანანი გაუგებრობა მგონია.

 

ჯოან როულინგის პოტერიადას, ვფიქრობ, წარდგენა არ სჭირდება. წიგნის უზომო პოპულარობას სკეპტიკოსები ეგზალტირებული თინეიჯერების ფაქტორით ხსნიან, მაგრამ რატომღაც ვერ ან არ ამჩნევენ, რომ პატარა, სათვალიანი ჯადოქრის ფანკლუბში ყოვლად ზრდასრული და მეტად გემოვნებიანი ადამიანებიც მრავლად მოიძებნებიან. სწორედ ამიტომ, დარწმუნებული ვარ, სიკეთისა და ბოროტების ჭიდილის მარადიულ თემაზე დაწერილი ეს საგა, სტეფანი მეიერის ვამპირული ეპოსისგან განსხვავებით, დროს გაუძლებს.

 

ტოლკინის ჯადოსნური სამყაროს მკვიდრთა შესახებ დღეს ყველამ ყველაფერი იცის. თუმცა, გობლინებს, პირველად, სახელგანთქმულ ტრილოგიაში კი არა, კლიფორდ საიმაკთან გადავაწყდი. შეკლის მოთხრობებს, პრატჩეტის რომანებს და აპრინის ფენტეზი-ციკლს, რადიკალურად განსხვავებული ჟანრობრივი კუთვნილების მიუხედავად, საერთო შტრიხი – იშვიათი იუმორი აერთიანებს. ფენტეზის დედოფლად აღიარებული ურსულა ლე გუინის “წყვდიადის მარცხენა ხელი” ჟანრის ორი უმაღლესი ჯილდოს – “ჰუგოს” და “ნებულას” პრემიების მფლობელია. ფრანგი ფანტასტის – პიერ ბულის “მაიმუნების პლანეტას” კი, სხვა ღირსებებთან ერთად, გამაოგნებელი ფინალი აქვს…

 

ფანტასტიკური ლიტერატურის ნებისმიერ ანთოლოგიას დაამშვენებდა რეი ბრედბერის “ფარენჰეიტი”, სტანისლავ ლემის “მაგელანის ღრუბელი”, ძმები სტრუგაცების “ორშაბათი იწყება შაბათს”, “განწირული ქალაქი” და “ძნელია, იყო ღმერთი”, რობერტ სილვერბერგის და ჰარი ჰარისონის თრილერები, არტურ კლარკის მოთხრობები, ტოლკინის “სინმარილიონი” –  როგორც ხედავთ, ჭეშმარიტად ღირებული ყველა წიგნისთვის  ოცეული მეტისმეტად ცოტა აღმოჩნდა.

ჩემთვის, როგორც ფანტასტიკის დიდი მოყვარულისათვის, ეს თემა ამოუწურავია, თუმცა, ვფიქრობ, უპრიანი იქნება, აქ შევჩერდე და ჩემს მკითხველს მოვუსმინო. დარწმუნებული ვარ, სათქმელი ბევრი გექნებათ. პოსტს კი ჟანრის კლასიკოსის, სახელგანთქმულ “უტოპია 14”-ის ავტორის კურტ ვონეგუტის ფრაზით დავასრულებ: “ფანტასტიკა – ეს არის კომიქსი ნახატების გარეშე”.

41.709981 44.792998

გააზიარე

• Click to share on Twitter (Opens in new window)
• Click to share on Facebook (Opens in new window)

Like this:

Like იტვირთება. . .

Related

Posted in მოლის ბიბლიოთეკა | Tagged აიზეკ აზიმოვი, ანდრეი ტარკოვსკი, არტურ კლარკი, კლიფორდ საიმაკი, მოლის ბიბლიოთეკა, პროზა, რეი ბრედბერი, როჯერ ზელაზნი, სტენლი კუბრიკი, ტერი პრატჩეტი, ფანტასტიკა, ფენტეზი, ფრანსუა ტრიუფო, ჯოან როულინგი, ჯონ ტოლკინი, ჰარი პოტერი | 105 Comments

105 Responses

1. on მაისი 20, 2011 at 12:13 AM | პასუხი Bookworm Elf

   ბრედბერი თავში მომეწონა <3 დღემდე ვერ გადამიწყვეტია ფარენჰეიტი უფრო მეტად მივყარს თუ მარსის ქრონიკები : ))
   ახლა ლე გუინის The Dispossessed:-ს ვკითხულობ და აღფრთოვენებული ვარ *_* The Left Hand of Darkness-ის ყიდვასაც ვგეგმავ აუცილებლად :3
   P.S. "სილმარილიონი" XD

   LikeLike

   
   
2. on მაისი 20, 2011 at 12:24 AM | პასუხი Mycroft

   წაკითხული:

   რეი ბრედბერი. “მარსის ქრონიკები”;
   ჯონ ტოლკინი. “ბეჭდების მბრძანებელი”;
   აიზეკ აზიმოვი. “მე, რობოტი”;
   სტანისლავ ლემი. “სოლარისი”;
   კლაივ სტეიპლ ლუისი. “ნარნიას ქრონიკები”;
   ჯოან როულინგი. პოტერიადა;
   სერგეი ლუკიანენკო. “ღამის გუშაგი”;

   ნანახი:

   არტურ კლარკი. “2001: კოსმოსური ოდისეა”;
   პიერ ბული. “მაიმუნების პლანეტა”;

   ველოდებით ქინდლს

   LikeLike

   
   
   • on მაისი 20, 2011 at 12:33 AM | პასუხი მოლი ბლუმი

     ქინდლს მეც ველოდები…

     LikeLike

     
     
   • on იანვარი 3, 2012 at 4:07 PM | პასუხი Mycroft

     + როჯერ ზელაზნი. “ამბერის ქრონიკები”;
     უფრო სწორად:
     Nine Princes in Amber
     The Guns of Avalon
     Sign of the Unicorn
     ჯერ.

     LikeLike

     
     
     • on იანვარი 3, 2012 at 4:10 PM | პასუხი მოლი ბლუმი

       ანუ ის, რაც ქართულად თარგმნა ლიგამუსმა.

       LikeLike

       
       
3. on მაისი 20, 2011 at 12:28 AM | პასუხი მოლი ბლუმი

   ჩემთვის ‘ქრონიკებია” პირველი :)

   კარგ რაღაცებს კითხულობ :აღტაცებულიმოლი:

   LikeLike

   
   
4. on მაისი 20, 2011 at 12:41 AM | პასუხი Lord Vader

   ამათგან არ წამიკითხავს პიკნიკი, ლუკიანენკო, ასფრინი, გილგამეში… ანდერსონის ეგ ნაწარმოებიც არ მახსენდება. მაგიის ფერიც არ მაქვს წაკითხული.
   ნარნია ნაწილი მაქვს წაკითხული.
   გაქრობის ფენომენი კი არ მახსოვს რომელია… თუ ვარსკვლავია – მაშინ ვიცი, თუ არა – არ წამიკითხავს.

   საიმაქის “ქალაქი” მირჩევნია… ჰაინლაინთან ძნელია თქმა – რომელსაც იმ მომენტში ვკითხულობს, ის მომწონს. :)
   ოდისეა კი არ მიყვარს.

   ბლოგოსფეროს აღიარებულმა ექსპერტმა

   ნწუ… :)

   LikeLike

   
   
   • on მაისი 20, 2011 at 12:48 AM | პასუხი მოლი ბლუმი

     ჰაინლაინთან შენ “puppet master” მოგწონს, ასე მახსოვს.

     წავიკითხე, მაგრამ თუ თრილერზე მიდგა საქმე, ჰარისონის ფოლადის ვირთხა მირჩევნია…

     საიმაკის თითქმის ყველაფერი მომწონს, მაგრამ ეს ყველას ჯობია, იმჰო, რა თქმა უნდა.

     ბესტერი – პალატაში გამოკეტილი ხალხი წარსულში რომ დასეირნობს, ოღონდ – საკუთარი წარმოდგენით შექმნილ წარსულში…

     ოდისეა რომ არ გიყვარს, ვიცი :)

     და ისიც ვიცი, ექსპერტი რომ ხარ :)

     LikeLike

     
     
     • on მაისი 20, 2011 at 12:57 AM | პასუხი Lord Vader

       ჰო…
       ჰაინლაინი ჩემთვის ის მწერალია, რომელსაც არ აქვს იმ დონის შედევრები, რაც ბესთერს აქვს ან დიქს ან საიმაქს, სამაგიეროდ ჩავარდნებიც არ აქვს. სტაბილურად მაღალ დონეზე წერს და კარგად იკითხება… თუმცა მარიონეტები ერთ-ერთი პირველი იყო რაც მაგისი წავიკითხე და გამომყვა. :)

       ფოლადის ვირთხის ციკლი არ წამიკითხავს. დავიწყე ადრე, მაგრამ რარაც არ წავიდა და თავი დავანებე.

       LikeLike

       
       
       • on მაისი 20, 2011 at 1:04 AM მოლი ბლუმი

         შემთხვევით, რომელიღაც ჟურნალში გადავაწყდი ვირთხას და შენ წარმოიდგინე, უგემრიელესად წამოიღო :) არადა, თხემით ტერფამდე ექშენია, არც დახვეწილ ბრედბერის ჰგავს და არც ღრმად აკადემიურ კლარკს და აზიმოვს… მაგრამ მაინც მომეწონა :)

         LikeLike

         
         
5. on მაისი 20, 2011 at 12:41 AM | პასუხი ნატო დავითაშვილი

   კარგი ”ოცი საუკეთესოა”, თუმცა მასში ძალიან მაკლია ჰერბერტის ”დიუნა” და ფრედერიკ პოლის ”ხიჩები”. მე ორივეს სიით პირველ ათეულში მოვახვედრებდი. ყველას ვურჩევ რომ წაიკითხოს. ამას წინათ ვფიქრობდი, რა იქნება ”ხიჩები” რომ გადაიღონ-მეთქი. აი, ”დიუნას” ეკრანული ტრილოგიით აღფრთოვანებული არა ვარ, თუმცა, ზედმიწევნით ზუსტი ეკრანირებაა ორივე ვერსიაში. წიგნით მიღებულს სიამოვნებას იოტისოდენადაც ვერ შეედრება.
   რა კარგია ფანტასტიკა/ფენტეზის რომ ამდენი დამფასებელი ჰყავს, არადა, ორიოდე თვის წინ გაზეთი ”24საათი” დარდობდა, ფენტეზის მცოდნე კაცი ვერ ვიპოვეთ, ინტერვიუ რომ ჩამოგვერთვაო. კარგად არ მოძებნეს. :)))

   LikeLike

   
   
   • on მაისი 20, 2011 at 12:51 AM | პასუხი მოლი ბლუმი

     კარგად ვერ მოძებნეს :) ფანტასტიკა ჩვენთან ძალიან ბევრს უყვარს…

     მე რაც წამიკითხავს და მომწონებია, იმის მიხედვით შევადგინე სია, ნატო :)

     საერთოდ, ასეა… უიშვიათესი შემთხევაა, ფილმი წიგნის ტოლფასი რომ გამოდის.

     LikeLike

     
     
6. on მაისი 20, 2011 at 12:51 AM | პასუხი Lord Vader

   დღემდე ვერ გადამიწყვეტია ფარენჰეიტი უფრო მეტად მივყარს თუ მარსის ქრონიკები

   ან ან ბრედბერისთან არ მუშაობს :)
   მაგალითად ველდი არ არის მარსის ქრონიკების ნაწილი, მაგრამ სრულიად გენიალური მოთხრობაა.

   კიდევ ბრედბერის აქვს არაჩვეულებრივი დეტექტივი – “სიკვდილი მარტოხელათა ბედია”, რომელიც ფანტასტიკა არაა. და სქოტ ჯოფლინის მუსიკითაა გაჟღენთილი. :) ძალიან მაგარი ნაწარმოებია.

   აზიმოვსაც აქვს კლასიკური დეტექტივი დაწერილი, თუმცა ისე რა… ცუდი არაა, მაგრამ არც გადასარევია.

   LikeLike

   
   
   • on მაისი 20, 2011 at 12:54 AM | პასუხი მოლი ბლუმი

     მაქვს შინ “სმერტ დელო ოდინიკიხ” – პირქუშია ძალიან. ან მე მომეჩვენა პირქუში.

     “ქრონიკები” უპირობოდ პირველია.

     LikeLike

     
     
     • on მაისი 20, 2011 at 1:03 AM | პასუხი Lord Vader

       კი პირქუშია. ყველა მარტოსულია მაგ რომანში. :)
       მაგრამ ეგ წიგნი ჯოფლინის რეგთაიმების ფონზე უნდა წაიკითხო და გახალისდება :)

       და როცა ფილიფ დიქი არ აქვს წაკითხული კიდევ უფრო მისალოცია…

       LikeLike

       
       
       • on მაისი 20, 2011 at 1:07 AM მოლი ბლუმი

         დიკი მაქვს წაკითხული. ბევრი არა, რაღაცები. თბილისში თითქმის ყველაფერს იშოვნი, დიკის გარდა…

         LikeLike

         
         
7. on მაისი 20, 2011 at 12:58 AM | პასუხი ნატო დავითაშვილი

   მოლი, თუ დიუნა და ხიჩები წასაკითხი გაქვს, რა ”მოსალოცი” ხარ. :) დიდი სიამოვნებით განვიცდიდი თავიდან მათი პირველი აღმოჩენის სიამოვნებას.
   პ.ს.თუ მოინდონებ, ეს წიგნები მაქვს.

   LikeLike

   
   
   • on მაისი 20, 2011 at 1:02 AM | პასუხი მოლი ბლუმი

     კი, აშკარად “მოსალოცი” ვარ :)

     დიუნა მხოლოდ თამაში ვიცი. ისიც თვალის ერთი შევლებით…

     მადლობა, ნატო :) ჯერ თავად მოვიძიებ და თუ ვერ ვიპოვნე, შეგაწუხებ :)

     LikeLike

     
     
8. on მაისი 20, 2011 at 1:02 AM | პასუხი Bookworm Elf

   უი ისე ქალბატონი ნატოს პოსტი რომ დავინახე გამახსენდა და ბარემ დავწერ : ))
   Tanith Lee-ს Tales From the Flat Earth დავამთავრე ახლახანს (<3) და მე4 წიგნში ფრთოსანი ლომი შემხვდა ^_^ გამიხარდა რაღაცნაირად XD ერთ-ერთი გამოცემის ყდაზეც ყოფილა… http://www.anime.ge/upload/images/Upload-1305838904-U325.jpg
   ისე ერთ-ერთი ჩემი საყვარელი ფენტეზია, და საერთოდაც Tanith Lee ძალიან მიყვარს <3

   LikeLike

   
   
9. on მაისი 20, 2011 at 1:09 AM | პასუხი Lord Vader

   ვირთხა ფორსაითის რომანის გმირიცაა. რომელსაც ქირაობენ რომ სერბი სამხედრო ჩამოიყვანოს ამერიკაში, რომელიც ეთნიკურ წმენდაშია ეჭვმიტანილი, CIA კი ხელს უშლის… ფინალი აქვს ძალიან მაგარი მაგ რომანს. “შურის მაძიებელი” ქვია.

   LikeLike

   
   
   • on მაისი 20, 2011 at 1:12 AM | პასუხი მოლი ბლუმი

     აუჰ… არ ვიცი. ლიბ.რუ-ზე ოთხი ფორსაიტი იდო და ეს არ ყოფილა. ვეძებ სასწრაფოდ.

     ვიპოვნე და გადმოვწერე კიდეც :) სენქს ე ლოთ!

     LikeLike

     
     
     • on მაისი 20, 2011 at 1:17 AM | პასუხი Lord Vader

       ახალია შედარებით – ბინ ლადენზეა უკვე. მეც არ მქონდა წაკითხული, არც ისე დიდი ხნის წინ წავიკითხე უკვე ქინდლში. მაგისთვის სხვა ბიბლიოთეკებიდან ვქაჩავ ხოლმე…
       სამწუხაროდ ყველაფერი წავიკითხე უკვე :(

       LikeLike

       
       
       • on მაისი 20, 2011 at 1:20 AM მოლი ბლუმი

         ალდებარანზე იდო პატიოსნად. თან უფასოდ.

         რა საშინელებაა, ყველაფერს რომ წაიკითხავ….

         იულიან სემიონოვზე დამემართა ასე. ყველაფერი წავიკითხე, კარგიც და ცუდიც… და ახლა ხელახლა ვფურცლავ ხოლმე.

         LikeLike

         
         
       • on მაისი 20, 2011 at 1:27 AM Lord Vader

         ნუ ცოცხალია ეგ კაცი და დაწერს კიდე რამეს. ბინ ლადენის ლიკვიდაციის ოპერაციაზე ველოდები :)

         და კობრა ვერ ვნახე ჯერ – შარშანდელი რომანია, სადაც უკვე ობამა ფიგურირებს.

         LikeLike

         
         
       • on მაისი 20, 2011 at 1:31 AM მოლი ბლუმი

         აი. ახლა ვკითხულობდი პირველ გვერდებს და ჯერჯერობით მშვენიერია – ოღონდ “ტურის დღეს” მაინც ვერაფერი აჯობებს.

         ახალ ფორსაიტებს, იმედია, ქინდლში წავიკითხავ.

         LikeLike

         
         
       • on მაისი 20, 2011 at 1:36 AM Lord Vader

         წამოვიდა უკვე? :)

         LikeLike

         
         
       • on მაისი 20, 2011 at 1:44 AM მოლი ბლუმი

         ახლახანს მიიღო დაშიფრული შეტყობინება…

         LikeLike

         
         
       • on მაისი 20, 2011 at 1:50 AM Lord Vader

         ლოლ…
         არა, ქინდლი თუ წამოვიდა-თქო. თუ გეგმაშია ჯერ. :)

         LikeLike

         
         
       • on მაისი 20, 2011 at 1:57 AM მოლი ბლუმი

         გეგმაშია, ოღონდ – უახლოესში. რაც მალე, მით უკეთესი…

         LikeLike

         
         
10. on მაისი 20, 2011 at 1:34 AM | პასუხი ნატო დავითაშვილი

    Bookworm Elf სამწუხაროდ, საკითხავად დრო ბევრი არ მრჩება. Tanith Lee-ს Tales From the Flat Earth არ ვიცი. ასე ვინიშნავ-ხოლმე საინტერესოს და იმედს არ ვკარგავ, რომ ოდესმე წავიკითხავ. რაც შეეხება მფრინავ ლომს, იმედი მაქვს ტარუტოს ხედ არ გადაიქცა ბოლოს :)

    LikeLike

    
    
11. on მაისი 20, 2011 at 10:16 AM | პასუხი ნატალია ჩხენკელი

    ადრეც დავწერე სადღაც, აქვე, რომ ფანტასტიკა არ მიყვარს, მაგრამ პოსტს და კომენტარებს რომ გადავხედე, ეჭვი შემეპარა – მგონი, ბევრი მაქვს დაკარგული :)

    LikeLike

    
    
    • on მაისი 20, 2011 at 12:12 PM | პასუხი მოლი ბლუმი

      დაკარგული ნაკლებად – უფრო მოსალოცად გაქვს საქმე :) წინ დიდი სიამოვნება გელის…

      LikeLike

      
      
12. on მაისი 20, 2011 at 10:27 AM | პასუხი Mary Poppins

    ნატალიას ვეთანხმები :) ჟანრის ასეთი მოყვარულების ფონზე მეც დავეჭვდი – ვაითუ, დიდ სიამოვნებას ვაკლებ საკუთარ თავს? თუმცა, პოტერიადა ჩემი უსაყვარლესი წიგნების სიაშია და “ბეჭდების მბრძანებელიც” ძალიან მომწონს.

    LikeLike

    
    
    • on მაისი 20, 2011 at 12:12 PM | პასუხი მოლი ბლუმი

      ჩემი არ გჯერა და ამ ხალხს მაინც დაუჯერე :)

      LikeLike

      
      
13. on მაისი 20, 2011 at 10:57 AM | პასუხი ten minutes older

    ეს ჟანრი (მიმართულებები) რომ არ ყოფილიყო, წიგნის კითხვას საერთოდ არ დავიწყებდი. “ბეჭდების მბრძანებელი” ჩემი ბიბლიაა )))

    LikeLike

    
    
    • on მაისი 20, 2011 at 12:03 PM | პასუხი მოლი ბლუმი

      ჯეოპარდის ბოლო პაკეტი ნახე?

      LikeLike

      
      
      • on მაისი 20, 2011 at 12:06 PM | პასუხი ten minutes older

        “ბეჭდების მბრძანებელზე” რომ იყო?! კი, როგორ არა და სამსახურშიც წავაკითხე მცოდნეებს. მაგრად გაასწორა, საკაიფო იყო )))

        LikeLike

        
        
        • on მაისი 20, 2011 at 12:10 PM მოლი ბლუმი

          დანქე! შენი კომენტარი და ლაიკი მოვისაკლისე და ჩავთვალე, რომ გამოგრჩა.

          ფესტივალი ჩავამთავროთ და დანარჩენი ორი წიგნის მიხედვითაც დავწერ.

          LikeLike

          
          
        • on მაისი 20, 2011 at 12:13 PM ten minutes older

          მასეთი რამეების გამოტოვება ნამდვილად უპატიებელი შეცდომაა. ლაიქი კი ნამდვილად დამავიწყდა, გადარეული კვირა იყო და გამოვასწორებ მაგ შეცდომას )))

          LikeLike

          
          
        • on მაისი 20, 2011 at 12:14 PM მოლი ბლუმი

          არადა, რომ იცოდე, როგორ უხდება პოსტს შენი ფერადი ავატარი…. :)

          LikeLike

          
          
14. on მაისი 20, 2011 at 2:49 PM | პასუხი tamaRa

    რა მშვენიალური პოსტია, ინფორმატიული…
    სულ არ მჭირდება წიგნების წაკითხვა :P

    LikeLike

    
    
    • on მაისი 20, 2011 at 2:54 PM | პასუხი მოლი ბლუმი

      პირიქით :) ამ პოსტის წაკითხვის შემდეგ რომელიმე წიგნს თუ გადმოიღებ თაროდან, ჩავთვლი, რომ მიზანი მიღწეულია :)

      დანკე :)

      LikeLike

      
      
      • on მაისი 20, 2011 at 3:26 PM | პასუხი tamaRa

        რა ვიცი, იქნება ბრედბერისკენ გამექცეს ხელი… საცდელად :)

        LikeLike

        
        
        • on მაისი 20, 2011 at 3:29 PM მოლი ბლუმი

          ცადე :) არ ინანებ :)

          LikeLike

          
          
        • on მაისი 20, 2011 at 4:38 PM Lord Vader

          ველდი ნახე. ძაან მაგარია, თან კოსმოსური ფრენები და ეგეთი რამეები არაა, რაც შეიძლება არ გევასებოდეს მაინცადამაინც.

          LikeLike

          
          
    • on მაისი 20, 2011 at 3:13 PM | პასუხი Lord Vader

      ჩემ sci-fi ლოგზე უნდა დავდო მაგ ჟანრის ყველაზე ეპოქალური ნაწარმოებების მოკლე შინაარსი :) დაახლოებით 1-2 გვერში რომ ჩაეტიოს ყველა :)

      LikeLike

      
      
      • on მაისი 20, 2011 at 3:21 PM | პასუხი მოლი ბლუმი

        რისთვის? :) პოპულარული კლასიკის საი ფი ვარიანტს აკეთებ? :)

        გადაიკითხეთ ბუმბერაზი კლასიკოსები :)

        შენი sci-fi ლოგის ლინკი მინდა…

        LikeLike

        
        
        • on მაისი 20, 2011 at 4:40 PM Lord Vader

          წინა კაცი უკანის ხიდიაო – ხომ გაგიგონია.
          წაიკითხე რაღაც – მოუყევი სხვას და ორივეს წაკითხული გექნებათ. :)

          LikeLike

          
          
        • on მაისი 20, 2011 at 5:04 PM მოლი ბლუმი

          ესეც მართალია :) ბლოგის ლინკი? თუ კონფიდენციალურია?

          LikeLike

          
          
        • on მაისი 20, 2011 at 5:12 PM Lord Vader

          http://planetkorriban.wordpress.com

          LikeLike

          
          
        • on მაისი 20, 2011 at 5:17 PM მოლი ბლუმი

          Vielen Dank!

          LikeLike

          
          
15. on მაისი 20, 2011 at 6:37 PM | პასუხი Borgez

    ძალიან სასიამოვნო პოსტია. :)

    ნატოს დავეთანხმები და დიუნას მოვისკალისებდი მეც. ფაქტობრივად ბიბლიაა ჯანრის.

    იმავე საიმაკსაც, რომელიც ჩემი აზრით გამორჩეულად წერს. მსგავსად იდეალური შერწყმა ფანტასტიკის და ფენტეზის ერთ წიგნში იშვიათად მინახავს. ძალიან სასიამოვნოდ იკითხება.

    სხვა მხრივ სია იდეალურია, ყველა ის ნაწარმოები ვიხილე რომელთაც ველოდი სათაურის წაკითხვის შემდეგ. :) განსაკუთრებით პრეტჩეტის და ტოლკინის დანახვამ გამახარა. :)

    პ.ს. თუ არ მიწყენთ ერთ რჩევას მოგცემთ: თუ ფენტეზი გიყვართ აუცილებლად წაიკითხეთ ჯორჯ მარტინი და ანჯეი საპკოვსკი. ამ ორმა ადამიანმა ჯანრი ახალ საფეხურზე აიყვანა ჩემი აზრით. :)

    LikeLike

    
    
    • on მაისი 20, 2011 at 6:53 PM | პასუხი მოლი ბლუმი

      მადლობა :)

      “დიუნას”, მარტინს და საპკოვსკის აუცილებლად მოვიძიებ. მონიტორიდან კითხვა მაინცდამაინც არ მეხერხება, ჩემთვის ცნობილ მაღაზიებში კი ამ ავტორებს არ შევხვდერივარ. რაღაცას მოვახერხებ…

      საიმაკი არის სიაში. “გობლინების ნაკრძალიდან” დაწყებული, თითქმის ყველაფერი მომწონს.

      LikeLike

      
      
      • on მაისი 21, 2011 at 12:23 AM | პასუხი Borgez

        როგორც კი განვაახლებთ(ექსლიბრისი) რუსული წიგნების შემოტანას, პირველ რიგში ვითჩერის საგას ჩამოვიტანთ რუსულად. :)

        LikeLike

        
        
        • on მაისი 21, 2011 at 12:38 PM მოლი ბლუმი

          იქნებ საიეს ფიქშენზეც გეფიქრათ…

          LikeLike

          
          
16. on მაისი 20, 2011 at 9:19 PM | პასუხი ნატო დავითაშვილი

    ახლა მარტინისა და საპკოვსკის სახსენებლად შემოვედი, ბორგეზმა დამასწრო:)
    არ ვიცი, რამდენად დამეთანხმებით, თუ აქ სტივენ კინგის ”ბნელ კოშკს” მივამატებ. რადგან ერთდროულად ყველა ჟანრს ეკუთვნის, ჩემი აზრით. დიდებული რომაა, ეს კი ფაქტია.

    LikeLike

    
    
    • on მაისი 20, 2011 at 9:26 PM | პასუხი მოლი ბლუმი

      მე კინგი არ მომწონს. თუმცა, ეს იმას არ ნიშნავს, რომ ცუდია და ალბათ, ნებისმიერ ტოპ-სიაში ეკუთვნის ადგილი,მაგრამ აქ – არა.

      LikeLike

      
      
17. on მაისი 20, 2011 at 9:42 PM | პასუხი ნატო დავითაშვილი

    ”ბნელი კოშკი” კინგის სრულიად ”სხვანაირი” ნაწარმოებია. ამ წიგნმა გამაოცა. რომ არ იცოდე მისი დაწერილი რომაა, ვერც კი წარმოიდგენ.

    LikeLike

    
    
    • on მაისი 20, 2011 at 10:08 PM | პასუხი მოლი ბლუმი

      ფანტასტიკა, ვესტერნი, ფენტეზი და ჰორორი… ანოტაცია წავიკითხე და დამაინტერესა, ნატო :)

      LikeLike

      
      
18. on მაისი 20, 2011 at 9:48 PM | პასუხი რუსა

    ჩემდა სამარცხვინოდ ამ ჩემონათვალიდან მარტო პოტერიადა მაქვს წაკითხული..ისიც ადრე,მაშინ დიდი შთაბეჭდილების ქვეშ ვიყავი , მაგრამ ახლა აღარ მომწონს…ეტყობა ეს ჟანრი ჩემში არ ზის..ახლა თავისუფალი დრო თითქმის არ მაქვს,თორემ გავეცნობოდი… ,,მარსის ქრონიკებს ”და ,,ბეჭდების მბრძანებელს ”მაინც…დამაინტერესე შენ :)

    LikeLike

    
    
    • on მაისი 20, 2011 at 10:03 PM | პასუხი მოლი ბლუმი

      მშვენიერია :) ამ პოსტის მიზანიც ეს იყო… თან, მხოლოდ საკუთარი იმპრესიების მიხედვით დავწერე. სულაც არ არის აუცილებელი, ფანტასტიკის გაცნობა მაინცდამაინც ამ ოცეულით დაიწყო. კარგ წიგნებს რა გამოლევს :)

      მადლობა შეფასებისთვის :)

      LikeLike

      
      
19. on მაისი 21, 2011 at 12:40 AM | პასუხი Lord Vader

    რახან ასეთი ლიკბეზია, მაშინ მეც დავამატებ.
    პირველ ყოვლისა ფილიფ დიქი – მისი ერთი 10 რომანი მაინც შეიძლება თავისუფლად დაემატოს ფანტასტიკის შედევრებს.
    და ვერნორ ვინჯის “ცეცხლი უბსკრულის თავზე”.

    მოლი ბლუმი
    ჰოდა, ყველამ რომ თითო რამე დაამატოს, იმდენი დაგიგროვდება წასაკითხი, რომ მაგ ფასად 3 ქინდლი მოგივა. :)

    LikeLike

    
    
    • on მაისი 21, 2011 at 12:34 PM | პასუხი მოლი ბლუმი

      დიკს ვკითხულობ…. მაღაზიაში ისეთი რამ ვნახო, რაც მაინტერესებს და ფასს ვინ უყურებს :) პარნასში ჰქონდათ პოკეტბუკები და აღარ აქვთ და ახალ პარტიას როდის შემოიტანენ, ღმერთმა იცის.

      და სხვაგან ფანტასტიკა არ მინახავს მე.

      LikeLike

      
      
      • on მაისი 21, 2011 at 12:50 PM | პასუხი Lord Vader

        რას?
        მაღაზიაში იყიდე თუ ინტერნეტიდან?

        LikeLike

        
        
        • on მაისი 21, 2011 at 1:04 PM მოლი ბლუმი

          მზის ლატარეა, ვულკანის ურო, მოთხრობები…

          ლიბ.რუ-ზე ვკითხულობდი. დიკი მაღაზიაში არ მინახავს.

          LikeLike

          
          
      • on მაისი 21, 2011 at 12:51 PM | პასუხი Lord Vader

        UBIK – ესაა ძალიან მაგარი… ნუ მაგას ბევრი აქვს მაგარი, მაგრამ ეს ძალიან ექსპერიმენტულია და არაჩვეულებრივი.

        LikeLike

        
        
        • on მაისი 21, 2011 at 1:04 PM მოლი ბლუმი

          უბიკი არ წამიკითხავს…

          LikeLike

          
          
        • on მაისი 21, 2011 at 1:12 PM Lord Vader

          ლატარეა არ წამიკითხავს. ვულკანი კი… ცუდი არაა. დეტექტივის ელემენტებით.
          თუმცა სხვები უფრო კარგი აქვს.

          LikeLike

          
          
        • on მაისი 21, 2011 at 1:23 PM მოლი ბლუმი

          შენ დაგეჯერება, მაესტრო :)

          LikeLike

          
          
        • on მაისი 21, 2011 at 1:25 PM Lord Vader

          ისე, უფრო ცნობილი და გვიანდელი ნაწარმოებებით ჯობს დაწყება. ადრეული დიქი ჯერ ისეთი დონე არაა, თან ტექნიკურადაც ბევრი რამე მოძველებულია… ჰოდა, გული არ აგიცრუვდეს :)
          მართლა შედევრებს რომ წაიკითხავ და უკვე იცი, რა მაგარია – მერე შეიძლება ძველებსაც გადახედა, ინტერესის გულისთვის.

          LikeLike

          
          
        • on მაისი 21, 2011 at 1:33 PM მოლი ბლუმი

          სწორი სტრატეგიაა – სტრუგაცკებთანაც კლასიკით დავიწყე და “სტაჟორების” მსგავს რაღაცებზე მერე გადავედი.

          LikeLike

          
          
      • on მაისი 21, 2011 at 7:51 PM | პასუხი Bookworm Elf

        ივნისში იქნება ახალი პარტია ^^ ფანტასტიკაც იქნება

        LikeLike

        
        
        • on მაისი 21, 2011 at 7:55 PM მოლი ბლუმი

          მაგრობაა :) გამახარე :)

          LikeLike

          
          
20. on მაისი 21, 2011 at 1:21 AM | პასუხი paran0id andr0id

    ამხელა ჩამონათვალიდან მხოლოდ ხუთი ც ა ლ ი?! :( წავედი მე, სამარცხვინოდ თავჩაქინდრულმა დავტოვე ეს ბლოგი…

    LikeLike

    
    
    • on მაისი 21, 2011 at 1:22 PM | პასუხი მოლი ბლუმი

      პირიქით :) “მოსალოცი” ყოფილხარ :) რამხელა სიამოვნება გელოდება წინ :)

      LikeLike

      
      
21. on მაისი 22, 2011 at 2:28 AM | პასუხი Mary Poppins

    ხვალ “მარსის ქრონიკები” მოაქვთ ჩემთვის. ფანტასტიკის კითხვას ვიწყებ.

    LikeLike

    
    
    • on მაისი 22, 2011 at 2:40 AM | პასუხი მოლი ბლუმი

      აღსანიშნავი მოვლენაა :) :) როგორ მოხდა, Sci Fi-თ რომ დაინტერესდი? :) :) :)

      LikeLike

      
      
22. on მაისი 22, 2011 at 2:59 AM | პასუხი Di@

    ბევრი წაკითხული მაქვს, ბევრსაც წავიკითხავ. მადლობა, რჩევისათვის <3

    LikeLike

    
    
    • on მაისი 22, 2011 at 3:00 AM | პასუხი მოლი ბლუმი

      მიხარია, რომ მოგეწონა, დია :)

      LikeLike

      
      
23. on ივნისი 2, 2011 at 10:54 PM | პასუხი გიორგი

    რობერტ შეკლი. “აბსოლუტური იარაღი”;

    ახლახანს გამოვიდა :)

    LikeLike

    
    
    • on ივნისი 2, 2011 at 11:44 PM | პასუხი მოლი ბლუმი

      ქართული თარგმანი გამოვიდა ახლახანს და არაფრად ვარგა :(

      LikeLike

      
      
24. on ივნისი 3, 2011 at 12:40 AM | პასუხი გიორგი

    მე სხვა მოთხრობები უფრო მომეწონა :)

    LikeLike

    
    
    • on ივნისი 3, 2011 at 12:43 AM | პასუხი მოლი ბლუმი

      აბსოლუტური იარაღი ძალიან კარგია. რძის ფურგონის რეისიც, კოე ჩტო ზადარომ, გუშაგი ჩიტებიც და საერთოდ, შეკლის ცუდი მოთხრობა არ მახსენდება – ქართული თარგმანია საშინლად უხარისხო. პირველი მოთხრობის პირველივე აბზაციდან ეტყობა.

      LikeLike

      
      
25. on ივნისი 3, 2011 at 12:59 AM | პასუხი გიორგი

    ეს ეხლა რაც გამოვიდა პირველადაა ქართულად?

    LikeLike

    
    
    • on ივნისი 3, 2011 at 1:01 AM | პასუხი მოლი ბლუმი

      მე წიგნად ქართული შეკლი არსად შემხვედრია და… შესაძლოა, ვცდები.

      LikeLike

      
      
26. on დეკემბერი 20, 2011 at 9:33 PM | პასუხი soffi

    ამ პოსტს კი უკვე ვეღარ გავცდი კომენტარის გარეშე :) მესამედი ძლივს მაქვს წაკითხული შენი სიიდან მოლი, რა საშინელებაა ღმერთო!!! :) გამუდმებით წიგნების სიმცირეს განვიცდი ჩემს გარშემო :) ამის გამო სამ უცხო ენას ვსწავლობ, იქნებ მერე ორიგინალში ან თარგმანებში მაინც ვიშოვო და წავიკითხო!!! ჯანდაბა ჯანდაბა ჯანდაბა!!!
    პ.ს. მომიტევეთ, ცოტა გავცხარდი :)

    LikeLike

    
    
    • on დეკემბერი 20, 2011 at 9:47 PM | პასუხი მოლი ბლუმი

      მესამედი ცოტა არ არის :) და ამ სიის დიდი უმრავლესობა, რუსულადაც მოიპოვება ელექტრონულ ბიბლიოთეკებში. თუმცა, ორიგინალში (ინგლისურად ანუ) ჯობია ნამდვილად. თითქმის ყველა მაქვს ინგლისურად წაკითხული და განსხვავება აშკარაა.

      შენი სამი უცხო ენით კიდევ უფრო მეტს წაიკითხავ.

      LikeLike

      
      
      • on დეკემბერი 20, 2011 at 10:06 PM | პასუხი soffi

        რუსული უკვე აღარაა ჩემთვის პრობლემა, კიდევ კარგი. ამ მხრივ ცოტა გზა ხსნილი მაქვს. :) მოკლედ რაა, საკუთარ თავს თავად თუ არ მიხედე…. :) მე თავად ვიქნები მთარგმნელი!!! :)

        LikeLike

        
        
        • on დეკემბერი 20, 2011 at 10:25 PM მოლი ბლუმი

          ჩვენც წაგვაკითხე მერე :)

          LikeLike

          
          
        • on დეკემბერი 20, 2011 at 10:30 PM soffi

          :D აუცილებლად, ხუმრობა იქით და ჩემი ოცნებაა რაც შეიძლება ბევრი წიგნი ვთარგმნო :)

          LikeLike

          
          
        • on დეკემბერი 20, 2011 at 10:40 PM მოლი ბლუმი

          სულაც არ ვხუმრობ :) მშვენიერი ოცნება გქონია.

          LikeLike

          
          
        • on დეკემბერი 20, 2011 at 10:44 PM soffi

          მადლობა :) წარმატებებს მე თვითონ ვისურვებ და გავეხეტები კიდეც ბლოგიდან :)

          LikeLike

          
          
        • on დეკემბერი 20, 2011 at 10:51 PM მოლი ბლუმი

          შენ თვითონ რატომ? ჩვენ გისურვებთ. მთელი სულით და გულით. ძალიან კარგი გეგმები გაქვს და იმიტომ.

          და არც გახეტებაა საჭირო :) პირიქით :) ასეთ სტუმრებს აქ ყოველთვის სიხარულით ხვდებიან.

          LikeLike

          
          
27. on მარტი 14, 2012 at 10:47 PM | პასუხი nodari

    451 farenheits exla vkitxulob da dzalian momwons !

    LikeLike

    
    
    • on მარტი 14, 2012 at 10:48 PM | პასუხი მოლი ბლუმი

      ერთ-ერთი საუკეთესო ბრედბერია

      LikeLike

      
      
28. on მარტი 26, 2012 at 9:25 PM | პასუხი nodari

    საიმაკის “გობლინთა ნაკრძალი” არც ისე ცუდაადაა ნათარგმნი

    LikeLike

    
    
    • on მარტი 26, 2012 at 9:26 PM | პასუხი მოლი ბლუმი

      მე მაინც არ მომეწონა :( რუსული გამოცემა მაქვს შინ და ჩვენი აშკარად აგებს.

      LikeLike

      
      
29. on მარტი 26, 2012 at 9:30 PM | პასუხი nodari

    :(

    LikeLike

    
    
    • on მარტი 26, 2012 at 9:32 PM | პასუხი მოლი ბლუმი

      ეგ არაფერი… ჩვენთანაც მოვა ფანტასტიკის ხარისხიანი თარგმანის დრო.

      LikeLike

      
      
30. on მარტი 26, 2012 at 9:35 PM | პასუხი nodari

    ლუკიანენკოს “ღამის გუშაგმა დამაინტერესა” წაკითხული გექნება? ქართულად მარტო იოტა რიდერზე ყოფილა :(

    LikeLike

    
    
    • on მარტი 26, 2012 at 9:38 PM | პასუხი მოლი ბლუმი

      მარტო ღამის გუშაგი არა, “გუშაგების” ციკლის ექვსივე ნაწილი ძალიან მომწონს. ბოლო ორი “ქინდლის” წყალობით წავიკითხე, ქართულად მხოლოდ იოტასთვის არსებობს, ვიცი. საუკეთესო თანამედროვე ციკლია ამ ჟანრში და ძალიან ცუდია, რომ არ თარგმნიან.

      LikeLike

      
      
31. on მარტი 26, 2012 at 9:59 PM | პასუხი nodari

    ნეტა წიგნად გამოსცენ :))

    LikeLike

    
    
    • on მარტი 26, 2012 at 10:00 PM | პასუხი მოლი ბლუმი

      იმედი ვიქონიოთ. ქართული თარგმანი მეც მაინტერესებს. მიუხედავად იმისა, რომ შინ ორიგინალი მაქვს.

      LikeLike

      
      
32. on მარტი 26, 2012 at 10:05 PM | პასუხი nodari

    ეს ახალი გამომცემლობა alliance publishing რაღაც მომწონს უბრალოდ ჯერ ცოტა წიგნი აქვთ გადათარგმნილი ! დაველოდოთ იქნებ კარგი წიგნები თარგმნონ ჯერ მარტო უმეტესობა რა გამოსცეს ფანტასტიკური ჟანრისაა

    http://www.facebook.com/pages/Alliance-Publishing/139036679459339

    LikeLike

    
    
    • on მარტი 26, 2012 at 10:07 PM | პასუხი მოლი ბლუმი

      არც ისე ახალია. კლარკიც მაგათ გამოსცეს თავის დროზე და საიმაკიც.

      LikeLike

      
      

კომენტარის დატოვება კომენტარის გაუქმება

Enter your comment here...

Fill in your details below or click an icon to log in:

ელფოსტა (Address never made public)

სახელი

ვებ-საიტი

You are commenting using your WordPress.com account. ( Log Out /  შეცვლა )

You are commenting using your Google account. ( Log Out /  შეცვლა )

You are commenting using your Twitter account. ( Log Out /  შეცვლა )

You are commenting using your Facebook account. ( Log Out /  შეცვლა )

გაუქმება

Connecting to %s

Notify me of new comments via email.

Notify me of new posts via email.

This site uses Akismet to reduce spam. Learn how your comment data is processed.